الماتى وبلىسىنىڭ ەڭبەكشىقازاق اۋدانىندا پوليسيا قىزمەتكەرلەرى پروكۋراتۋرانىڭ ۇيلەستىرۋىمەن پسيحوتروپتىق زاتتار جاسايتىن جاسىرىن زەرتحانانىڭ جۇمىسىن توقتاتتى، دەپ حابارلايدى infohub.kz سايتى.
ەڭبەكشىقازاق اۋدانى پوليسيا باسقارماسىنىڭ باستىعى، پوليسيا پولكوۆنيگى تولەۋ مارحامەدوۆتىڭ ايتۋىنشا، جەدەل-ىزدەستىرۋ ءىس-شارالارى بارىسىندا ساياجاي القاپتارىنىڭ ءبىرىنىڭ اۋماعىنان ارنايى جابدىقتالعان عيمارات تابىلعان.
«تەرگەۋ ارەكەتتەرى كەزىندە قۇرامىندا حيميالىق زاتتار مەن پرەكۋرسورلار بار 60-تان استام كانيستر، زەرتحانالىق جابدىق جانە باسقا دا قۇرىلعىلار تاركىلەندى»، — دەدى پولكوۆنيك مارحامەدوۆ.
ساراپتاما قورىتىندىسىنا سايكەس، تاركىلەنگەن زاتتاردىڭ ىشىنەن ماسساسى 388،97 گرامم ا-PVP پسيحوتروپتىق زاتى انىقتالدى. الدىن الا ەسەپتەۋلەر بويىنشا، بۇل شامامەن 2 مىڭ ءبىر رەتتىك دوزاعا تەڭ.
«زاڭسىز ءوندىرىستى ۇيىمداستىردى دەگەن كۇدىكپەن 31 جاستاعى ەر ادام ۇستالدى. سوت وعان قاماۋعا الۋ تۇرىندەگى بۇلتارتپاۋ شاراسىن سانكسيالادى»، — دەپ قوستى پولكوۆنيك مارحامەدوۆ.
قازىرگى تاڭدا پرەكۋرسورلار مەن جابدىقتاردى ساتىپ الۋ كوزدەرى، ىقتيمال قارجىلاندىرۋ ارنالارى، سونداي-اق قۇقىققا قايشى ارەكەتكە قاتىسى بار باسقا دا ادامدار انىقتالۋدا.