الەۋمەتتىك جەلىلەردە الماتى وبلىسىندا حقكو قىزمەتكەرى قىزمەتتىك كولىكپەن ولىممەن اياقتالعان جول-كولىك وقيعاسىن جاساعانى تۋرالى اقپارات تارادى. «ازاماتتارعا ارنالعان ۇكىمەت» مەملەكەتتىك كورپوراسياسىندا بۇل وقيعاعا تۇسىنىكتەمە بەردى، دەپ حابارلايدى infohub.kz.
جاريالانىمعا سايكەس، حقكو قىزمەتكەرى قىزمەتتىك كولىكپەن ايەلدى قاعىپ كەتكەن، كەيىن ول اۋرۋحانادا قايتىس بولعان. ماتىندە ايتىلعانداي، فيليال ديرەكتورى بۇل فاكتىنى جاسىرعان. «قىزمەتتىك كولىكتى ستانسيادان تاۋىپ، جكو ورنىن تاستاپ كەتكەن، جاقىندا عانا ۇستادى، ماماندى قاماۋعا الدى»، — دەلىنگەن حابارلامادا.
جكو ەڭبەكشىقازاق اۋدانىنىڭ شەلەك اۋىلىندا تۇنگى ۋاقىتتا، جۇمىس ۋاقىتىنان تىس بولعانى ايتىلادى. «ازاماتتارعا ارنالعان ۇكىمەت» مەملەكەتتىك كورپوراسياسى 2026 جىلعى 11 تامىزدا الماتى وبلىسىندا فيليال قىزمەتكەرى قاتىسقان جكو بولعانىن راستادى.
«وقيعا تۋرالى اقپارات العاننان كەيىن مەمكورپوراسيا ءوز قۇزىرەتى شەگىندە قىزمەتتىك تەرگەۋ جۇرگىزدى، ونىڭ بارىسىندا لاۋازىمدى تۇلعالاردىڭ ارەكەتتەرىنە، ىشكى باقىلاۋ دەڭگەيىنە جانە قىزمەتتىك كولىكتى پايدالانۋدى ۇيىمداستىرۋعا باعا بەرىلدى»، — دەپ حابارلادى «ازاماتتارعا ارنالعان ۇكىمەتتە».
مەمكورپوراسيانىڭ مالىمەتىنشە، قىزمەتتىك تەرگەۋ قورىتىندىسى بويىنشا لاۋازىمدى تۇلعالارعا تارتىپتىك شارالار قولدانىلدى. فيليال ديرەكتورىنىڭ جالپى ماسەلەلەر جونىندەگى ورىنباسارى قىزمەتتىك كولىكتى پايدالانۋدى باقىلاۋدى تيىسىنشە ۇيىمداستىرماعانى جانە قىزمەتتىك اقپاراتتىڭ تولىقتىعى مەن وبەكتيۆتىلىگىن قامتاماسىز ەتپەگەنى ءۇشىن تارتىپتىك جاۋاپكەرشىلىككە تارتىلدى. فيليال ديرەكتورى جالپى باسشىلىق پەن فيليال قىزمەتىن باقىلاۋ، ىشكى باقىلاۋ جۇيەسىن ۇيىمداستىرۋ، سونداي-اق م ۇلىكتىڭ ساقتالۋى مەن ماقساتتى پايدالانىلۋىن قامتاماسىز ەتۋ بولىگىندە قىزمەتتىك مىندەتتەرىن تيىسىنشە ورىنداماعانى ءۇشىن تارتىپتىك جاۋاپكەرشىلىككە تارتىلدى.
«بۇل رەتتە قىزمەتتىك كولىكتى باسقارعان قىزمەتكەردىڭ تىكەلەي زاڭدى جاۋاپكەرشىلىگى ماسەلەسى ايرىقشا قۇقىق قورعاۋ جانە سوت ورگاندارىنىڭ قۇزىرەتىنە جاتادى. جاۋاپكەرشىلىكتىڭ دارەجەسى مەن سيپاتى قولدانىستاعى زاڭناماعا سايكەس قىلمىستىق ءىس جۇرگىزۋ جانە سوت تالقىلاۋى اياسىندا ايقىندالاتىن بولادى. مەملەكەتتىك كورپوراسيا قايتىس بولعان ايەلدىڭ تۋىستارى مەن جاقىندارىنا قايعىرا كوڭىل ايتادى»، — دەپ اتاپ ءوتتى «ازاماتتارعا ارنالعان ۇكىمەتتە».
سونداي-اق NUR.KZ ءتىلشىسى الماتى وبلىسى پوليسيا دەپارتامەنتىنە تۇسىنىكتەمە سۇراپ جۇگىندى.