2026 جىلدىڭ باسىنان بەرى الماتى قالاسىنىڭ قۇقىق قورعاۋ ورگاندارى زاڭسىز اينالىمنان جالپى سالماعى 235 كەلى بولاتىن 4 270 دانا سۋىق قارۋدى تاركىلەدى، دەپ حابارلايدى infohub.kz سايتى.
پوليسيا دەپارتامەنتىندە اتاپ وتكەندەي، تاركىلەنگەن زاتتاردىڭ اراسىندا پىشاقتار، دۋبينكالار جانە باسقا دا ءقاۋىپتى زاتتار بار. وسىعان بايلانىستى ءتارتىپ ساقشىلارى مەگاپوليس تۇرعىندارىنا زاڭدى ساقتاۋعا جانە مۇنداي زاتتاردى وزىمەن بىرگە الىپ جۇرمەۋگە شاقىردى.
«اسىرەسە جاستار مەن ستۋدەنتتەرگە ۇندەۋ سالامىز: "كەرەك بولىپ قالار" دەپ مۇنداي زاتتاردى وزىڭىزبەن بىرگە الىپ جۇرمەڭىز. كادىمگى جانجال اۋىر جاعدايعا ۇلاسىپ، اۋىر زارداپتارعا اكەلۋى مۇمكىن. ۇرىس-كەرىس كەزىندە قول استىندا تۇرعان ءقاۋىپتى زات وقيعانىڭ ودان ءارى دامۋىن وزگەرتە الادى»، — دەدى پد قىزمەتكەرى تيمۋر نوگايبايەۆ.
پوليسيا زاڭسىز اينالىم جانە قارۋ الىپ ءجۇرۋ ءۇشىن جاۋاپكەرشىلىك قاراستىرىلعانىن ەسكە سالدى. «ءبىزدىڭ ماقساتىمىز — قۇقىق بۇزۋشىلىقتاردىڭ جولىن كەسۋ عانا ەمەس، ولاردىڭ الدىن الۋ. زاڭدى ساقتاڭىز، اينالاڭىزداعىلاردى قۇرمەتتەڭىز جانە ءوز قاۋىپسىزدىگىڭىزگە جاۋاپكەرشىلىكپەن قاراڭىز»، — دەپ اتاپ ءوتتى تيمۋر نوگايبايەۆ.