الماتى ورتالىعىندا پروبلەمالىق ايماق انىقتالدى. بيىلعى جىلدىڭ باسىنان بەرى وسى ايماقتاعى قاتار ورنالاسقان 11 ويىن-ساۋىق مەكەمەسىنە پوليسيا قىزمەتكەرلەرى 167 رەت شاقىرتىلعان، دەپ حابارلايدى infohub.kz سايتى.
الماتى پوليسيا دەپارتامەنتى Instagram-پاراقشاسىندا 11 ويىن-ساۋىق مەكەمەسىنىڭ مەكەنجايىن جاريالادى. ولار نازاربايەۆ داڭعىلى، 120 جانە 124 مەكەنجايلارىندا ورنالاسقان. پوليسەيلەر شاقىرتۋلاردى وڭدەۋ ءۇشىن ءجيى وسى مەكەمەلەرگە بارادى.
انىقتالعان بۇزۋشىلىقتار بويىنشا 257 اكىمشىلىك حاتتاما تولتىرىلدى. مەكەمە باسشىلارىنا قۇقىق بۇزۋشىلىققا ىقپال ەتەتىن سەبەپتەر مەن جاعدايلاردى جويۋ تۋرالى ۇسىنىستار جولداندى. اكىمشىلىك قۇقىق بۇزۋشىلىق تۋرالى كودەكستىڭ 479-بابىنا سايكەس قاجەتتى شارالار قابىلداماعانى ءۇشىن تاعى 11 حاتتاما تولتىرىلدى.
«بۇل ايماق پوليسيانىڭ ەرەكشە باقىلاۋىندا. ءبىز تەك جاسالعان قۇقىق بۇزۋشىلىقتارعا عانا ەمەس، تۇنگى تىنىشتىقتى بۇزۋ جانە قوعامدىق ءتارتىپتىڭ بۇزىلۋى تۋرالى حابارلاعان تۇرعىنداردىڭ وتىنىشتەرىنە دە ارەكەت ەتەمىز. مەكەمە يەلەرى مەن باسشىلارى ءتۇسىنۋى كەرەك: ويىن-ساۋىق مەكەمەسىنىڭ جۇمىسىن ۇيىمداستىرۋ ىرگەلەس اۋماقتاعى قاۋىپسىزدىك پەن تارتىپكە جاۋاپكەرشىلىكتى دە قامتيدى»، — دەپ ەسكەرتتى الماتى قالالىق پوليسيا دەپارتامەنتىنىڭ قوعامدىق قاۋىپسىزدىك باسقارماسىنىڭ باستىعى تيمۋر نوعايبايەۆ.
ونىڭ ايتۋىنشا، ءتارتىپ بۇزۋشىلىقتار تۇراقتى تۇردە تىركەلەتىن مەكەمەلەردە پروفيلاكتيكالىق جانە باقىلاۋ ءىس-شارالارى كۇشەيتىلەتىن بولادى.