الماتىدا پوليسيا پسيحيكالىق دەنساۋلىق ورتالىعىنان ءوز بەتىمەن كەتىپ قالعان ەكى ناۋقاستى ىزدەپ جاتىر. نەللي شاحراي مەن دەنيس انتيپين ورتالىقتان ءارتۇرلى كۇندەرى قاشىپ كەتكەن، دەپ حابارلايدى infohub.kz.
Lider.kz ۆولونتەرلەرى Instagram-دا دەنيس انتيپين مەن نەللي شاحرايدىڭ بەت-بەينەسى جازىلعان ىزدەۋ پاراقتارىن جاريالادى. ولار الماتىداعى پسيحيكالىق دەنساۋلىق ورتالىعىنان كەتىپ قالعان. اقپاراتقا سايكەس، نەللي شاحراي بوستاندىق اۋدانىندا ورنالاسقان مەكەمەدەن 16 ساۋىردە ساعات 9:00 شاماسىندا شىعىپ كەتكەن. ىزدەۋ پاراعىندا: «بويى 167 سم، ورتاشا دەنە ءبىتىمى، كوزى قوڭىر، شاشى اشىق-قوڭىر، اراسىندا اق ءتۇسى بار، ۇزىن، بەتىندە بورتپە بار. كيىمى: قويۋ كوك ءتۇستى ۆەليۋر كوفتا، كۇلگىن شالبار، كوك رەزەڭكە تاپكي. باعدارى بۇزىلعان. پسيحيكالىق اۋىتقۋى بار» دەلىنگەن.
ۆولونتەرلەردىڭ مالىمەتىنشە، دەنيس انتيپين سول ورتالىقتان 13 مامىردا قاشىپ كەتكەن. ەر ادامنىڭ بويى 180 سم، ورتاشا دەنە ءبىتىمى، اشىق-قوڭىر شاشى، اق ءتۇسى ارالاسقان، قوڭىر كوزدەرى جانە سول كوزىنىڭ جانىندا مەڭى بار. ول قارا كەۋدەشە، اق فۋتبولكا، قارا شالبار جانە قارا سلانسى كيگەن.
ۆولونتەرلەر قالا جانە وبلىس تۇرعىندارىنا ۇندەۋ جاسادى: «قالا جانە وبلىس تۇرعىندارىن ىزدەۋ پاراقتارىن مۇقيات قاراپ، ىزدەۋدەگى ادامداردىڭ بەت-بەينەسىن ەستە ساقتاۋلارىن سۇرايمىز. كوشەلەرگە، اۋلالارعا، پودەزدەرگە، ايالدامالارعا، بازارلارعا، ۆوكزالدارعا، قوعامدىق كولىككە جانە ادام كوپ جينالاتىن باسقا دا ورىندارعا نازار اۋدارىڭىزدار. ۇقساس ادامداردى بايقاعان جاعدايدا، ولاردى ءوز بەتىڭىزبەن ۇستاۋعا نەمەسە جانجالعا تۇسۋگە تىرىسپاڭىز. ىزدەۋ پاراعىندا كورسەتىلگەن تەلەفوندارعا نەمەسە 102 ءنومىرى بويىنشا پوليسياعا حابارلاڭىز».
الماتى پوليسيا دەپارتامەنتىندە NUR.KZ تىلشىسىنە الەۋمەتتىك جەلىلەردە تاراعان اقپارات مەديسينالىق مەكەمەنىڭ ەكى ناۋقاسىنىڭ جوعالۋىنا قاتىستى ەكەنىن حابارلادى. «ەر ادام مەن ايەل مەديسينالىق مەكەمەنى ءارتۇرلى كۇندەرى تاستاپ كەتكەن جانە ولار بىر-بىرىمەن بايلانىستى ەمەس. ەكى فاكت بويىنشا بوستاندىق اۋدانىنىڭ پوليسيا باسقارماسىندا ىزدەستىرۋ ىستەرى قوزعالدى. قازىرگى ۋاقىتتا ازاماتتاردىڭ ورنالاسقان جەرىن انىقتاۋعا جانە ولاردى مەديسينالىق مەكەمەگە قايتارۋعا باعىتتالعان جەدەل-ىزدەستىرۋ ءىس-شارالارىنىڭ كەشەنى جۇرگىزىلۋدە»، — دەپ مالىمدەدى پوليسيادا.