الماتىدا قاسقىردىڭ جىنىس مۇشەلەرى، سونىڭ ىشىندە كەپتىرىلىپ، تۇزدالعان «قاسقىر قۇنقاسى» ساتىلىمعا قويىلعان. ساتۋشى ونى بيزنەسمەندەرگە، جۇرگىزۋشىلەرگە جانە ساتسىزدىككە ۇشىراعان ادامدارعا ارنالعان تۇمار دەپ اتايدى. بۇل تۋرالى «Halyqstan» Telegram-ارناسى حابارلادى، دەپ جازادى infohub.kz سايتى.
ارنانىڭ مالىمەتىنشە، ساتۋشى قاسقىردىڭ تەرىسى، تىرناعى جانە ازۋ تىستەرىمەن قاتار انالىق قاسقىردىڭ جىنىس مۇشەسىن دە ساتىپ الۋعا ۇسىنادى.
ساتۋشىنىڭ ايتۋىنشا، كەپتىرىلىپ، تۇزدالعان بۇل بولىك بيزنەسمەندەر مەن جۇرگىزۋشىلەرگە «جول اشادى» جانە ساتسىزدىكتەردەن قورعايدى. سونداي-اق ساتۋشى بۇل اتريبۋتتى بەدەۋلىك كەزىندە دە قولدانۋعا بولاتىنىن ايتادى — ول ءۇشىن ونى وزىمەن بىرگە الىپ ءجۇرىپ، ەشكىمگە كورسەتپەۋ جەتكىلىكتى.
سونىمەن قاتار ساتۋشى تەك ب ۇلىنبەگەن، تىستەلمەگەن جانە تىرنالماعان دانانىڭ «جۇمىس ىستەيتىنىن» العا تارتادى.
«كۋرسيۆ» باسىلىمى مۇنداي ساۋدانىڭ زاڭدىلىعى تۋرالى ەكولوگيا جانە تابيعي رەسۋرستار مينيسترلىگىنە سۇراۋ جولدادى.
ۆەدومستۆو تۇسىندىرگەندەي، قاسقىر قازاقستاندا سانى رەتتەلۋگە ءتيىس جانۋارلار تۇرىنە جاتادى. مۇنداي رەتتەۋ حالىقتىڭ دەنساۋلىعىن قورعاۋ، قورشاعان ورتاعا زيان كەلتىرمەۋ جانە اۋىل شارۋاشىلىعىنا ەلەۋلى زيان ءقاۋپىن بولدىرماۋ ءۇشىن جۇرگىزىلەدى.
الايدا زاڭ اتالعان جانۋارلاردىڭ ازاماتتار مەن ۇيىمداردىڭ مەنشىگىندە بولۋىنا جول بەرەدى.
«زاڭنامادا بەلگىلەنگەن تارتىپپەن، ءتيىستى رۇقساتتار نەگىزىندە تابيعي ورتادان الىنعان قاسقىرلار ولاردى اۋلاعان جەكە نەمەسە زاڭدى تۇلعالاردىڭ مەنشىگىنە وتەدى»، — دەپ حابارلادى ەكولوگيا مينيسترلىگى.
بۇعان دەيىن تۇركىستاندا مىسىق كولىك رولىنە وتىرىپ، سوقتىعىسقانى حابارلانعان بولاتىن.