الماتىدا قايرات ساتىبالدى ۇلىنا تيەسىلى بولعان بۇرىنعى قوناق ءۇي عيماراتىنىڭ تاعدىرى انىقتالدى. عيمارات بۇزىلمايدى، كەرىسىنشە جوندەۋدەن ءوتىپ، IT-حابقا اينالادى، دەپ حابارلايدى infohub.kz.
بۇعان دەيىن مەملەكەتتىك م ۇلىك جانە جەكەشەلەندىرۋ دەپارتامەنتى 2023 جىلعى تامىزدا سىيعا تارتۋ شارتى نەگىزىندە قوناق ءۇيدىڭ مەملەكەت كىرىسىنە وتكەنىن، ال سول جىلعى قىركۇيەكتە سوت اكىمشىلىگى دەپارتامەنتىنىڭ بالانسىنا بەرىلگەنىن حابارلاعان ەدى. الايدا جەلىدە عيماراتتى بۇزۋى مۇمكىن دەگەن اقپارات تارادى.
الماتى قالالىق اكىمدىگى NUR.KZ ءتىلشىسىنىڭ ساۋالىنا جاۋاپ بەرىپ، بۇل قاۋەسەتتى جوققا شىعاردى. وندا عيمارات بۇزىلمايتىنىن، ونىڭ ورنىنا كەشەندى جوندەۋ جۇمىستارى جۇرگىزىلىپ جاتقانىن مالىمدەدى. اتاپ ايتقاندا، عيماراتتىڭ قاسبەتى، تەرەزە ويىقتارى، ىشكى بولمەلەرى قالپىنا كەلتىرىلىپ، ىرگەلەس اۋماق اباتتاندىرىلۋدا. كۇردەلى جوندەۋدەن كەيىن عيمارات پايدالانۋعا بەرىلەدى.
جوبانىڭ ينۆەستورى — «LeanQor» ج ش س. «الماتى» اكك» اق جۇمىستاردى جۇرگىزۋ ءۇشىن عيماراتتى ۇسىنسا، قارجىلاندىرۋ ينۆەستوردىڭ مەنشىكتى قاراجاتى ەسەبىنەن جۇزەگە اسىرىلادى. جوبا مەملەكەت باسشىسىنىڭ IT جانە AI ينفراقۇرىلىمىن دامىتۋ، كادرلار دايارلاۋ جانە وسى سالالارداعى قۇزىرەتتەردى ارتتىرۋ جونىندەگى تاپسىرماسىنا سايكەس جۇزەگە اسىرىلۋدا.
اكىمدىكتە قالانىڭ زاماناۋي نىساندارعا دەگەن قاجەتتىلىگىن ەسكەرە وتىرىپ، بوس تۇرعان عيماراتتى بۇزباي، پايدالانۋ تۋرالى شەشىم قابىلدانعانىن ءتۇسىندىردى. جوبا اياقتالعاننان كەيىن عيمارات جەر تەلىمىمەن بىرگە «الماتى قالاسىنىڭ سيفرلاندىرۋ باسقارماسى» كوممۋنالدىق مەملەكەتتىك مەكەمەسىنە بەرىلەدى. نىسان سيفرلاندىرۋ جانە جاساندى ينتەللەكت سالاسىنداعى مەملەكەتتىك باعدارلامالاردى ىسكە اسىرۋ، سونداي-اق IT، AI، كرەاتيۆتى يندۋستريا جانە ساباقتاس باعىتتارداعى رەزيدەنتتەردى ورنالاستىرۋ ءۇشىن پايدالانىلاتىن بولادى.
ەسكە سالا كەتەيىك، 2022 جىلعى قىركۇيەكتە سوت قايرات ساتىبالدى ۇلىن ۇرلىق ءىسى بويىنشا كىنالى دەپ تانىپ، ونى التى جىلعا باس بوستاندىعىنان ايىردى. كەيىن وعان مەرزىمىنەن بۇرىن شارتتى تۇردە بوساتۋدان باس تارتىلدى. 2024 جىلعى ساۋىردە استانادا ساتىبالدى ۇلىنىڭ ءىسى بويىنشا جاڭا سوت باستالىپ، ونىڭ رەسەيدەگى، باا-دەگى، فرانسياداعى جانە قازاقستانداعى مۇلكى قارالدى. ساتىبالدى ۇلى مەملەكەتكە جىلجىمايتىن م ۇلىك پەن ليۋكس اۆتوكولىكتەردى قايتارۋعا كەلىستى. انتيكوردىڭ دەرەگىنشە، ونىڭ ءىسى بويىنشا تاعى 50 ملرد تەڭگە قايتارىلادى، ال باس پروكۋراتۋرا بۇل سوماعا م ۇلىك مەملەكەتكە قايتارىلاتىنىن حابارلادى.