الماتىدا «سوفيا» تۇرعىن ءۇي كەشەنىنىڭ تۇرعىندارى ىستىق سۋ ماسەلەسىن شەشۋدى تالاپ ەتىپ، تۇنگى نارازىلىق اكسياسىنا شىقتى. وقيعا ورنىنان تۇسىرىلگەن ۆيدەو kris__p__kaz Instagram پاراقشاسىندا جاريالاندى، دەپ حابارلايدى infohub.kz سايتى.
ۆيدەو سيپاتتاماسىندا ايتىلعانداي، الماتىنىڭ الاتاۋ اۋدانىنداعى «سوفيا» تۇرعىن ءۇي كەشەنىنىڭ تۇرعىندارى ىستىق سۋمەن جابدىقتاۋ ماسەلەسىنە نازار اۋدارۋدى تالاپ ەتتى.
الماتى اكىمدىگى جاعدايعا قاتىستى تۇسىنىكتەمە بەردى. ءباسپاسوز قىزمەتىنىڭ مالىمەتىنشە، الاتاۋ اۋدانىنداعى «سوفيا» تۇرعىن ءۇي كەشەنىندە 11 قىركۇيەكتە ىستىق سۋمەن جابدىقتاۋدا ءۇزىلىس بولعان. سەبەبى — م ۇلىك يەلەرى بىرلەستىگى (ميب)، باسقارۋشى كومپانيا جانە ەنەرگيامەن جابدىقتاۋشى ۇيىم اراسىنداعى قارىز بەن شەشىلمەگەن كەلىسىمشارت ماسەلەلەرى.
اكىمدىك ارالاسقاننان كەيىن قازاندىقتىڭ جۇمىسى مەن ىستىق سۋ بەرۋ سول كۇنى 23:20-دا قالپىنا كەلتىرىلدى. قولدا بار اقپاراتقا سايكەس، تۇرعىنداردىڭ ەلەكتر ەنەرگياسى بويىنشا جالپى قارىزى 24،83 ملن تەڭگە، تاعى شامامەن 7 ملن تەڭگە اۆتونومدى قازاندىقتىڭ جۇمىسىنا تيەسىلى. ميب مالىمەتىنشە، جەكە قازاندىق ەلەكتر ەنەرگياسىن تۇرعىن ءۇي كەشەنىنىڭ جەلىلەرى ارقىلى الادى، ءبىراق ونى ەلەكترمەن جابدىقتاۋعا جەكە كەلىسىمشارت جاسالماعان.
تۇرعىندار شاعىمدانعان سوڭ وقيعا ورنىنا الاتاۋ اۋدانى اكىمى اپپاراتىنىڭ جانە الماتى اكىمدىگىنىڭ بەيىندى باسقارمالارىنىڭ وكىلدەرى جەدەل كەلدى. ميب، «Volden V» ج ش س باسقارۋشى كومپانياسى جانە ەنەرگيامەن جابدىقتاۋشى ۇيىممەن بىرلەسىپ، جاعدايدى رەتتەۋ جانە ىستىق سۋمەن جابدىقتاۋدى قالپىنا كەلتىرۋ جۇمىستارى جۇرگىزىلدى.
قازىرگى تاڭدا قازاندىق قالىپتى رەجيمدە جۇمىس ىستەپ تۇر. الماتى اكىمدىگى جاعدايدى باقىلاۋدا ۇستاۋدى جالعاستىرۋدا. تاراپتار قارىز بەن كەلىسىمشارتتىق قاتىناستار ماسەلەلەرىن زاڭنامادا بەلگىلەنگەن تارتىپپەن پىسىقتاۋدا.