الماتىدا بيىلعى جىلدىڭ ساۋىرىندە ايالداما كەشەنىندە ايەلگە شابۋىل جاساعان ەر ادامعا ۇكىم شىعارىلدى. سوت ونى ءبىر جىلعا باس بوستاندىعىنان ايىردى، دەپ حابارلايدى infohub.kz سايتى.
سوت كابينەتىندە جاريالانعان ءىس ماتەريالدارىنا سايكەس، ت. دەپ بەلگىلەنگەن ايىپتالۋشى جابىرلەنۋشىنىڭ باسىنا، بەتىنە جانە دەنەسىنە بىرنەشە رەت سوققى بەرگەن.
«ت. 2026 جىلعى 23 ساۋىردە ساعات 06.10 شاماسىندا قارعالى شاعىن اۋدانىنداعى ساناتورنايا كوشەسىندە ورنالاسقان ايالداما كەشەنىندە بۇزاقىلىق نيەتپەن، گ.-نىڭ شابۋىل كۇتپەيتىنىن جانە بەلسەندى قارسىلىق كورسەتە المايتىنىن پايدالانىپ، وعان ەكى قولىنىڭ جۇدىرىعىمەن باسى مەن بەتىنە 5-6 رەت سوققى بەردى. سونداي-اق اياعىمەن دەنەسى مەن باسىنا 2-3 رەت تەپتى، وسىلايشا بۇزاقىلىق نيەتپەن وعان جەڭىل دەنساۋلىق زيانىن كەلتىردى»، — دەلىنگەن ۇكىمنىڭ سيپاتتاما بولىگىندە.
سوت وتىرىسى بارىسىندا ايىپتالۋشى كىناسىن تولىق مويىنداپ، وكىندى. سوت ونى كىنالى دەپ تانىپ، ءبىر جىلعا باس بوستاندىعىنان ايىرۋ جازاسىن تاعايىندادى. جازاسىن ەڭ جوعارى قاۋىپسىزدىكتەگى قىلمىستىق-اتقارۋ جۇيەسى مەكەمەسىندە وتەيدى.
سونىمەن قاتار سوت جابىرلەنۋشىنىڭ تالاپ-ارىزىن قاناعاتتاندىردى. ناتيجەسىندە سوتتالعان ادام وعان ماتەريالدىق جانە مورالدىق زياندى، سونداي-اق سوتتا وكىلدىك ەتۋ شىعىندارىن وتەۋ رەتىندە 1،5 ملن تەڭگەدەن استام تولەۋگە مىندەتتەلدى.
ەسكە سالايىق، 23 ساۋىردە الماتىنىڭ ءبىر ايالداماسىندا 68 جاستاعى ايەلگە ەر ادام شابۋىل جاساعانى بەلگىلى بولدى. ول ايەلگە بىرنەشە رەت سوققى بەرگەن. پوليسيا قىلمىستى ءىزىن سۋىتپاي اشقانىن مالىمدەدى. كۇدىكتى ۇستالىپ، ۋاقىتشا ۇستاۋ يزولياتورىنا قامالدى.
سونداي-اق ايەلگە مەديسينالىق كومەك كورسەتىلىپ، ميىنا كومپيۋتەرلىك توموگرافيا جاسالعانى حابارلاندى. تەكسەرۋ ناتيجەسىندە مي قان اينالىمىنىڭ جەدەل بۇزىلۋى مەن ميدىڭ سوعىلۋ بەلگىلەرى انىقتالمادى.
بۇعان قوسا، شابۋىلداۋشىنىڭ بۇرىن سوتتالعانى بەلگىلى بولدى: ول ۇيىنە كەلگەن ەر ادامداردىڭ بىرىنە پىشاق سالىپ، ەكىنشىسىنە اۋىر دەنساۋلىق زيانىن كەلتىرگەن. سوت ت.-نى قورعاندى دەپ شەشىپ، وعان 2 جىلعا باس بوستاندىعىنان ايىرۋ جازاسىن تاعايىنداعان.