Almaty SuperSki جوباسىنىڭ جەرلەرى ەرەكشە قورعالاتىن تابيعي اۋماقتار قۇرامىنان شىعارىلمايدى، ءارى بۇل اۋماقتا جەكە ۆيللالار مەن كوتتەدجدەر سالۋ قاراستىرىلماعان. بۇل تۋرالى Kazakh Tourism Development كومپانياسىنىڭ باس اتقارۋشى ديرەكتورى ەرجان ەركىنبايەۆ مالىمدەدى، دەپ حابارلايدى infohub.kz سايتى.
ونىڭ ايتۋىنشا، قازىرگى جوبا ون جىل بۇرىنعى باستامادان تۇبەگەيلى وزگەشە. ول كەزدە الماتىلىقتاردىڭ نارازىلىعىن تۋدىرىپ، اقىرى جوبادان باس تارتىلعان بولاتىن.
«10 جىل بۇرىن حالىقتى ءۇش نارسە الاڭداتتى. بىرىنشىدەن، جەر ۇلتتىق پارك قۇرامىنان شىعارىلىپ، ج ش س بالانسىنا بەرىلدى. ەكىنشىدەن، جوبا كوپتەگەن جەكە ۆيللا سالۋدى كوزدەدى. ۇشىنشىدەن، شاتقالدى قورشاپ، حالىقتىڭ كىرۋىنە تىيىم سالىنادى دەگەن قاتتى الاڭداۋشىلىق بولدى»، — دەدى ەرجان ەركىنبايەۆ.
بۇگىندە، سپيكەر اتاپ وتكەندەي، حالىقتى الاڭداتقان ءۇش سەبەپ تە جويىلدى. جەر ەرەكشە قورعالاتىن تابيعي اۋماق قۇرامىندا قالادى جانە ەشكىمنىڭ بالانسىنا بەرىلمەيدى.
«ۆيللالارعا قاتىستى بارلىق قۇجاتتا اۋماقتا جەكە كوتتەدجدەر مەن ۆيللالار بولمايتىنىن بەكىتتىك. ال تاۋ شاڭعىسى كۋرورتىن قورشاۋعا ەشكىم نيەتتەنىپ وتىرعان جوق»، — دەدى Kazakh Tourism Development باس اتقارۋشى ديرەكتورى.
ەرجان ەركىنباەۆتىڭ ايتۋىنشا، ۇلتتىق پاركپەن ىنتىماقتاستىق بىرلەسكەن قىزمەت تۋرالى شارت نەگىزىندە جۇزەگە اسىرىلادى. اۋماقتى دامىتۋ قاجەتتى ينفراقۇرىلىمدى، ونىڭ ىشىندە كولىك جانە تۋريستىك نىسانداردى، سونداي-اق دەنساۋلىق ساقتاۋ جانە ءبىلىم بەرۋ مەكەمەلەرىن سالۋدى كوزدەيدى.
سونداي-اق ول ەرەكشە قورعالاتىن تابيعي اۋماقتاردىڭ جەرلەرىن تۋريستىك نىساندار سالۋ ءۇشىن شىعارۋ مۇمكىندىگى بۇگىنگى زاڭنامادا قاراستىرىلماعانىن اتاپ ءوتتى.