الماتى اۋەجايىنان اۆستراليالىق ءتۋريستىڭ تاكسيگە 32 مىڭ تەڭگە تولەگەنى بەلگىلى بولدى. ادەتتە بۇل باعىتقا 2 مىڭ تەڭگە جۇمسالادى. ەندى كۇدىكتى جۇرگىزۋشى سوتقا تارتىلادى، دەپ حابارلايدى infohub.kz.

«31 ارنا» جازۋىنشا، وقيعا Threads الەۋمەتتىك جەلىسىندەگى جازبادان كەيىن جاريا بولدى. پايدالانۋشىنىڭ ايتۋىنشا، تاكسيست اۆستراليالىق تۋريستەن اۋەجايدان شىققان جول ءۇشىن 32 مىڭ تەڭگە تالاپ ەتكەن، ال شىن مانىندە باعاسى شامامەن 2 مىڭ تەڭگە بولعان.

جازبا اۆتورىنىڭ سوزىنشە، جۇرگىزۋشى جولاۋشىنىڭ زاتتارىن بەرمەيمىن دەپ قورقىتقان. سونىڭ سالدارىنان شەتەلدىك 16 ەسە قىمبات تولەۋگە ءماجبۇر بولعان.

ءىس مۇنىمەن بىتپەدى: پوليسەيلەر تاكسيستىڭ ىزىنە ءتۇستى.

«وسى دەرەك بويىنشا اقبتك-نىڭ 463-بابىنىڭ 1-بولىگىنە سايكەس اكىمشىلىك ءىس قوزعالدى. يۋريسديكسياعا ساي، شەشىم قابىلداۋ ءۇشىن ءىس ماتەريالدارى سوتقا جىبەرىلدى»، — دەدى الماتى قالالىق پوليسيا دەپارتامەنتىنىڭ رەسمي وكىلى سالتانات ازىربەك.

ەگەر سوت جۇرگىزۋشىنى كىنالى دەپ تانىسا، وعان 64 مىڭنان 173 مىڭ تەڭگەگە دەيىن ايىپپۇل سالىنۋى مۇمكىن.

ال اۋەجاي ماڭىندا كليەنت كۇتىپ تۇرعان باسقا جۇرگىزۋشىلەر ارىپتەسىنىڭ ارەكەتىنە ءارقالاي قارايدى.

«مىسالى، وسىندا ءبىر ساعات تۇرساڭ. تۇراق بىزگە ساعاتىنا ءبىر جارىم ساعاتقا 1500–2000 تەڭگە. بۇل دا بيزنەس. سوسىن سول اقشانى قايتارۋ كەرەك، ءسويتىپ ءسال قىمبات شىعادى»، — دەيدى جۇرگىزۋشى.

ايتپاقشى، الماتى اۋەجايى شەتەلدىكتەرگە ارنايى تاكسي تۇراعىنا بارۋدى ۇسىنادى. وندا رەسمي اگرەگاتورلاردان كولىك شاقىرۋعا بولادى، كەيبىرەۋىندە ءتىپتى قاشىقتىقتى ەسكەرىپ، تۇراقتى باعا بەلگىلەنگەن.

ال اۆتوساراپشىلار ەلدە تاكسي سالاسىندا حالىقارالىق ويىنشىلار جەتىسپەيدى دەپ سانايدى.

«ەگەر بىزدە 2–3 حالىقارالىق اگرەگاتور بولسا، ادام تۇسىنەر ەدى، الدەبىر جەردە مىناداي نەمەسە مىناداي شاقىرۋعا بولادى دەگەن اقپارات ىلىنەر ەدى. وتىنەمىز، ءسىزدىڭ ۇسىنىسىڭىز. ەگەر بار بولسا، ول وسىندا جۇمىس ىستەر ەدى. ءبىز تايلاندقا بارعاندا قاي اگرەگاتور جۇمىس ىستەيتىنىن بىلەمىز، ول حالىقارالىق. ءبىراق بىزگە نەگە كەلمەيدى؟ سەبەبىن بىلمەيمىن. مۇمكىن، كىرگىزبەيدى. مۇمكىن، جاعداي جاساۋ كەرەك»، — دەپ اتاپ ءوتتى اۆتوساراپشى الەكسەي الەكسەيەۆ.

ول جاڭا اگرەگاتورلاردىڭ كەلۋى باسەكەلەستىككە سەرپىن بەرەتىنىن ايتتى. ال ول ءوز كەزەگىندە باعانىڭ تومەندەۋىنە ىقپال ەتەدى.