الماتىدا تاعى دا كوشەدە توبەلەس بولدى، وعان ەكى جۇرگىزۋشى قاتىستى. بەينەگە تۇسكەن وقيعا پوليسيانىڭ نازارىن اۋدارىپ، ەندى قۇقىقبۇزۋشىعا قىلمىستىق جاۋاپكەرشىلىك ءقاۋپى ءتونىپ تۇر، دەپ حابارلايدى infohub.kz.
جانجالدىڭ بەينەجازباسى kris_p_almata Instagram-پاراقشاسىندا جاريالاندى. كادرلاردا 20 تامىزدا قازىبەك تاۋاسارۋلى كوشەسىندە Mercedes كولىگىنىڭ جۇرگىزۋشىسى جولدى جاۋىپ تاستاعانى، ال جول بەرۋ وتىنىشىنە اگرەسسيامەن جاۋاپ بەرگەنى كورىنەدى. ناتيجەسىندە ول Kia Rio جۇرگىزۋشىسىمەن ايتىسىپ، توبەلەسكە ۇلاسقان.
الماتى پوليسيا دەپارتامەنتىندە جاعدايعا تۇسىنىكتەمە بەردى. ۆەدومستۆونىڭ مالىمەتىنشە، 41 جاستاعى Mercedes جۇرگىزۋشىسى 30 جاستاعى قارسىلاسىنا بىرنەشە سوققى جاساعان. كۇدىكتى ۇستالىپ، ۋاقىتشا ۇستاۋ يزولياتورىنا قامالدى. بۇزاقىلىق فاكتىسى بويىنشا قىلمىستىق ءىس قوزعالدى.
قازىرگى ۋاقىتتا سوتقا دەيىنگى تەرگەۋ جۇرگىزىلۋدە. پوليسەيلەر ۇستالعان ادامنىڭ ارەكەتىنە زاڭ اياسىندا ءپرينسيپتى باعا بەرىلەتىنىن جانە ول قازاقستان رەسپۋبليكاسىنىڭ زاڭناماسىنا سايكەس جازاعا تارتىلاتىنىن مالىمدەدى.
ايتا كەتەيىك، بەينەجازبادا ادەپسىز سوزدەر بار، سوندىقتان روليك 18 جاستان اسقان كورەرمەندەرگە ارنالعان.
بۇعان دەيىن الماتىداعى اۆتوبۋستاردىڭ بىرىندە ەكى ەر ادام توبەلەسىپ، ءۇشىنشىسى ولاردى اجىراتۋعا تىرىسقان بەينە تاراعان ەدى. پوليسيا بۇل وقيعاعا دا جاۋاپ بەردى.