الماتىدا تراۆماتولوگيا جانە ورتوپەديانىڭ وڭىرلىك ورتالىعى جۇمىسىن باستادى. ول مەگاپوليس پەن الماتى وبلىسىنىڭ مەديسينالىق قىزمەتتەرىن بىرىكتىرەدى. مەكەمە №4 قالالىق كلينيكالىق اۋرۋحاناسىنىڭ بازاسىندا اشىلدى، دەپ حابارلايدى infohub.kz سايتى.
دەنساۋلىق ساقتاۋ مينيسترلىگىندە اتاپ وتكەندەي، ەندى الماتى مەن وبلىس تۇرعىندارى اۋىر جاراقاتتار العان جاعدايدا مامانداندىرىلعان جانە جوعارى تەحنولوگيالىق كومەكتى تولىق سيكلمەن الا الادى. بۇل شۇعىل قابىلداۋدى دا، كۇردەلى حيرۋرگيالىق وپەراسيالاردى دا قامتيدى. سونىمەن قاتار، مۇندا وڭالتۋ شارالارى دا جۇرگىزىلەدى.
«مۇنداي ورتالىقتىڭ قالادا پايدا بولۋى الماتى مەن الماتى وبلىسىنىڭ تراۆماتولوگيالىق قىزمەتتەرىنىڭ تيىمدىلىگى مەن ۇيلەسىمدىلىگىن ارتتىرۋعا مۇمكىندىك بەرەدى»، – دەپ اتاپ ءوتتى ۆەدومستۆودا.
اكادەميك باتپەنوۆ اتىنداعى ۇلتتىق تراۆماتولوگيا جانە ورتوپەديا عىلىمي ورتالىعىنىڭ ديرەكتورى ولجاس بەكاريسوۆ وڭىرلىك تراۆماتولوگيالىق ورتالىقتاردىڭ استانادا (ۇتوعو بازاسىندا)، قاراعاندىدا (پروفەسسور ح.ج. ماقاجانوۆ اتىنداعى كوپبەيىندى اۋرۋحانا بازاسىندا) جانە بالقاشتا جۇمىس ىستەپ تۇرعانىن اتاپ ءوتتى. «الماتىداعى جاڭا ورتالىق بۇكىل وڭتۇستىك ءوڭىر ءۇشىن نەگىزگى بۋىنعا اينالادى»، – دەپ قوستى ول.
بۇعان دەيىن 2026 جىلدىڭ باسىنان باستاپ ەلىمىزدە 403 توسەك-ورىنعا ارنالعان 26 جاڭا بەيىندى بولىمشە اشىلعانى حابارلانعان بولاتىن. دەنساۋلىق ساقتاۋ مينيسترلىگىنىڭ مالىمەتىنشە، ولار كارديولوگيا، گاستروەنتەرولوگيا، نەفرولوگيا، پۋلمونولوگيا، رەۆماتولوگيا، ەندوكرينولوگيا جانە گەماتولوگيانى قامتيتىن جەتى باعىت بويىنشا جۇمىس ىستەيدى. اعىمداعى جىلدىڭ سوڭىنا دەيىن 30-دان استام اۋداندىق اۋرۋحانانى كوپبەيىندى دەڭگەيگە دەيىن قايتا جاراقتاندىرۋ جوسپارلانۋدا.