الماتىدا تۇڭعىش پرەزيدەنت ساياباعى كەلۋشىلەر ءۇشىن ۋاقىتشا جابىلادى. بۇل — اۋماقتا جوندەۋ جۇمىستارىنىڭ جۇرگىزىلۋىنە بايلانىستى، دەپ حابارلايدى infohub.kz.
الماتى اكىمدىگىنىڭ مالىمەتىنشە، مەگاپوليستە تۇڭعىش پرەزيدەنت ساياباعىن رەكونسترۋكسيالاۋ جۇمىستارى جالعاسۋدا. وسىعان وراي قۇرىلىس-مونتاج جۇمىستارى ءجۇرىپ جاتقان كەزەڭدە ساياباق اۋماعى كەلۋشىلەر ءۇشىن تولىعىمەن جابىلادى.
رەكونسترۋكسيا اياسىندا ينجەنەرلىك جانە جول-جاياۋ جۇرگىنشىلەر ينفراقۇرىلىمىن جاڭارتۋ، اۋماقتى كەشەندى اباتتاندىرۋ جانە كوگالداندىرۋ جوسپارلانۋدا.
رەكونسترۋكسيا كەزەڭىندە قالا تۇرعىندارى مەن قوناقتارى جاقىن ورنالاسقان Flow Park ساياباعىنا بارا الادى. وعان ىرگەلەس اۋماقتاردى جالعايتىن جاياۋ جۇرگىنشىلەر كوپىرى ارقىلى جەتۋگە بولادى.
جۇمىستاردىڭ اياقتالۋ مەرزىمى مەن ساياباقتىڭ اشىلۋ كۇنى تۋرالى قوسىمشا حابارلانادى. اكىمدىك ازاماتتاردى سەرۋەندەۋدى جوسپارلاۋ كەزىندە ۋاقىتشا شەكتەۋدى ەسكەرۋدى سۇرايدى.
ەسكە سالايىق، بۇعان دەيىن ساياباقتى وزگەرتۋ جوسپارلارى، ونىڭ ىشىندە شامامەن 150 بەينەباقىلاۋ كامەراسىن ورناتۋ تۋرالى حابارلانعان بولاتىن. سونداي-اق ساياباق 2010 جىلدان بەرى جوندەلمەگەنى جانە ونى كەزەڭ-كەزەڭىمەن جابۋ جوسپارلانعانى ايتىلعان. كەيىن رەكونسترۋكسيا كەزىندە نۇرسۇلتان نازارباەۆتىڭ ەسكەرتكىشى دەمونتاجدالاتىنى بەلگىلى بولدى.