الماتىداعى تۇرعىن ءۇي كەشەنىندە بولعان ورتتەن زارداپ شەككەندەردىڭ ءبىرى، دارىگەرلەردىڭ رەانيماسيالىق شارالارىنا قاراماستان، قايتىس بولدى، دەپ حابارلايدى infohub.kz.
الماتى تجد مالىمەتىنشە، 23 تامىزدا ساعات 22:49-دا ءادى ءشارىپوۆ كوشەسى، 145 مەكەنجايىنداعى 13 قاباتتى تۇرعىن ءۇي كەشەنىندە ءورت شىققانى تۋرالى حابارلاما 101 پۋلتىنە تۇسكەن. 5 مينۋت ىشىندە جەتكەن العاشقى بولىمشەلەر تەحنيكالىق بولمەدە جانە ەكىنشى پودەزد قاباتتارىندا كابەلدەردىڭ، سونداي-اق ءبىرىنشى پودەزدتىڭ 7-دەن 13-قاباتىنا دەيىنگى ەلەكتر قالقاندارىنىڭ جانعانىن انىقتادى.
جەدەل شارالاردىڭ ارقاسىندا ءورت ساعات 23:57-دە وقشاۋلانىپ، 00:14-تە ءسوندىرىلدى. قۇتقارۋ قالپاقتارىن پايدالانىپ، باسپالداقپەن 148 ادام، ونىڭ ىشىندە 9 بالا قۇتقارىلدى. ءتورت ادام اۋرۋحاناعا جەتكىزىلدى.
زارداپ شەككەندەردىڭ ءبىرى ەسىنەن تانىپ جاتقان كۇيدە تابىلدى. كەلگەن دارىگەرلەردىڭ رەانيماسيالىق شارالارىنا قاراماستان، ونى امان الىپ قالۋ مۇمكىن بولمادى.
ءورتتى سوندىرۋگە ءتجد-نىڭ 90-عا جۋىق قىزمەتكەرى مەن 25 تەحنيكاسى جۇمىلدىرىلدى. ءورتتىڭ تاراۋىنا ءورت تۋرالى كەش حابارلاۋ سەبەپ بولدى: تۇرعىنداردىڭ ايتۋىنشا، اۆتوماتتى ءورت دابىلى ءورت ءسوندىرۋ بولىمشەلەرى شاقىرىلعانعا دەيىن ءبىر جارىم ساعات بۇرىن ىسكە قوسىلعان، الايدا ورتكە قارسى قىزمەتكە ۋاقىتىلى حابارلاما تۇسپەگەن.
بۇعان دەيىن ورت-تەحنيكالىق تەكسەرۋ ناتيجەلەرى بويىنشا جاۋاپتى تۇلعالارعا ءورت قاۋىپسىزدىگى تالاپتارىنىڭ بۇزۋشىلىقتارىن جويۋ تۋرالى نۇسقاما بەرىلگەن بولاتىن. ءورتتىڭ سەبەبى انىقتالىپ جاتىر.