الماتىدا بالالار شۇعىل مەديسينالىق كومەك ورتالىعىنىڭ دارىگەرلەرى جاڭا تۋعان قىز بالاعا كۇردەلى وتا جاساپ، سالماعى 2 كگ ىسىكتى الىپ تاستادى. بۇل بالانىڭ دەنە سالماعىنىڭ جارتىسىن قۇراعان، دەپ حابارلايدى infohub.kz سايتى.
ءسابي 18 تامىزدا جۇكتىلىكتىڭ 34-اپتاسىندا سەگىزكوز-قۇيىمشاق ايماعىنداعى ىسىكپەن دۇنيەگە كەلدى. تۋىلعان كەزدە قىزدىڭ سالماعى 4 كگ بولسا، ىسىك 2 كگ-عا جەتكەن. بۇل پاتولوگيا تۋعان كەزدە قاتەرلى ەمەس، الايدا ءومىرىنىڭ العاشقى التى ايىندا ونكولوگيالىق اۋرۋعا اينالۋى مۇمكىن، سوندىقتان مۇنداي ىسىگى بار نارەستەلەرگە دەرەۋ وتا جاسالادى.
تۋعاننان كەيىنگى العاشقى ساعاتتاردا نەوناتالدىق رەانيماتولوگتار مەن حيرۋرگتار توبى بالانى ورتالىققا جەتكىزۋ ءۇشىن پەرزەنتحاناعا باردى. قىزدى جاڭا تۋعان نارەستەلەردىڭ رەانيماسيا بولىمشەسىنە جات قىزىپ، اۋقىمدى وتاعا دايىنداي باستادى. كەلەسى كۇنى دارىگەرلەر ىسىكتى الىپ تاستاۋ وتاسىن جاسادى.
ورتالىقتىڭ بولىمشە مەڭگەرۋشىسى ساماتبەك مىرزاحمەتتىڭ ايتۋىنشا: "بۇل — سەگىزكوز-قۇيىمشاق ايماعىنىڭ تەراتوماسى، ياعني ءارتۇرلى تەكتەس تىندەردەن، سونىڭ ىشىندە سۇيەك، جۇمساق تىندەر مەن كيستالىق قۋىستاردان تۇراتىن ىسىك. بۇل ءبىزدىڭ تاجىريبەدەگى ەڭ كۇردەلى وتالاردىڭ ءبىرى بولدى: سالماعى 2 كگ ىسىك — بالانىڭ سالماعىمەن تەڭ دەرلىك. تۋعان كەزدەگى جالپى سالماق 4 كگ بولسا، ءدال جارتىسىن ىسىك قۇرادى. وتا ءساتتى ءوتتى. ىسىكتى العان سوڭ بىردەن پلاستيكالىق وتا جاسادىق. تىگىستەر بايقالمايدى، الداعى ۋاقىتتا ءسابي ەشقانداي قولايسىزدىق سەزىنبەيدى. بالا امان-ەسەن ۇيىنە شىعارىلادى".
تەراتوما ىشتە دامىپ، جۇكتىلىكتىڭ 20-اپتاسىندا سكرينينگ كەزىندە انىقتالعان. ەرلى-زايىپتىلار جۇكتىلىكتى ساقتاپ قالۋ ءۇشىن بارلىق مۇمكىندىكتى جاسادى: ولار بىرنەشە كونسيليۋم مەن بشمكو حيرۋرگتارىنىڭ كەڭەسىنەن ءوتتى. دارىگەرلەر دەنساۋلىقتىڭ نەگىزگى كورسەتكىشتەرىن ديناميكالىق باقىلاپ وتىردى. 34-اپتادا ءسابي كەسار تىلىگى ارقىلى دۇنيەگە كەلدى.
قىزدىڭ اناسى اياجان: "بۇل — ءتورت ۇلدان كەيىنگى كوپتەن كۇتكەن قىز. جۇكتىلىكتىڭ 20-اپتاسىندا دارىگەرلەر سەگىزكوز-قۇيىمشاق تەراتوماسىن انىقتادى، ءبىز بىردەن بشمكو-عا كەڭەسكە كەلدىك. جالپى جۇكتىلىك جاقسى ءوتتى. 34-اپتادا ءىشىم اۋىرىپ پەرزەنتحاناعا ءتۇستىم، ماعان بىردەن كەسار تىلىگى جاسالدى، سودان كەيىن بالاممەن وسىندا اۋىستىرىلدىق. قىزىمدى قۇتقارعان وسى اۋرۋحانا دارىگەرلەرىنە وتە ريزامىن. بالامدى تۋعاننان كەيىن كوردىم، سول ۇلكەن ىسىكتى كوردىم. بالامنىڭ ەمىنە قاتىسقان بارلىعىنا راحمەت"، — دەدى.
ايتا كەتەيىك، سەگىزكوز-قۇيىمشاق تەراتوماسى — جاڭا تۋعان نارەستەلەردەگى ەڭ كوپ تارالعان ىسىك. ول انا قۇرساعىندا پايدا بولىپ، بالامەن بىرگە وسەدى، كەيبىر جاعدايلاردا اۋىر اسقىنۋلارعا جانە ومىرلىك ماڭىزدى ورگانداردىڭ جۇمىسىنىڭ بۇزىلۋىنا اكەلۋى مۇمكىن. بۇل جاعدايدا ىسىك ۇلكەن مولشەرگە دەيىن وسكەن.
جىل باسىنان بەرى الماتىداعى بالالار شۇعىل مەديسينالىق كومەك ورتالىعىنىڭ جاڭا تۋعان نارەستەلەر بولىمشەسىنە 96 بالا اۋىستىرىلدى، ونىڭ 72-سىنە حيرۋرگيالىق ارالاسۋ قاجەت بولدى. تۋا بىتكەن اقاۋلاردىڭ دامۋىنا ءارتۇرلى ىشكى جانە سىرتقى فاكتورلار، سونىڭ ىشىندە تۇقىم قۋالاۋشىلىق، ينفەكسيالار جانە باسقا دا اسەرلەر ىقپال ەتۋى مۇمكىن.