الماتىدا نازاربايەۆ پەن ءال-فارابي داڭعىلدارىنىڭ قيىلىسىنا جۋىق جەردە جاڭا ساياباق سالۋ ءۇشىن 20-دان استام جەر ۋچاسكەسى الىنادى. قالا اكىمىنىڭ ءتيىستى قاۋلىلارى «ۆەچەرني الماتى» گازەتىندە جاريالاندى، دەپ حابارلايدى infohub.kz سايتى.
قۇجاتتارعا سايكەس، اكىمدىك مەملەكەت مۇقتاجى ءۇشىن قالانىڭ مەدەۋ اۋدانىنداعى 21 جەر ۋچاسكەسىن ماجبۇرلەپ يەلىكتەن شىعارۋدى باستاۋدى ۇيعاردى. ءسوز ورتاق پايدالانىلاتىن نىسان — ءال-فارابي داڭعىلىنان وڭتۇستىككە، نازاربايەۆ داڭعىلىنان باتىسقا قاراي ورنالاساتىن ساياباق تۋرالى بولىپ وتىر.
ماجبۇرلەپ يەلىكتەن شىعارۋ كۇنى بەلگىلەندى — 2028 جىلعى 31 جەلتوقسان. مەنشىك يەلەرىنە زاڭنامادا بەلگىلەنگەن تارتىپپەن وتەماقى تولەنەدى، ال الىنعان سوڭ جەر ۋچاسكەلەرى الماتىنىڭ قوعامدىق كەڭىستىكتەردى دامىتۋ باسقارماسىنىڭ بالانسىنا بەرىلەدى. بۇزۋ جۇمىستارى كيرپيچنوزاۆودسكايا، پانفيلوۆ جانە نازاربايەۆ كوشەلەرىندەگى ۋچاسكەلەردىڭ يەلەرىنە قاتىستى بولادى.
سونىمەن قاتار قالانىڭ باسقا اۋداندارىندا دا بىرنەشە ۋچاسكە الىنادى. ماسەلەن، قۇلجا تراكتىسى، 94 مەكەنجايىنداعى ۋچاسكە سۋ قۇبىرىنىڭ سورعى ستانسياسىن سالۋ ءۇشىن الىنادى. كورشىلەس قۇلجا تراكتىسى، 94/2 ۋچاسكەسى رىسقۇلوۆ داڭعىلىنان بۇقتىرما كوشەسىنە دەيىنگى قۇلجا تراكتىسىن رەكونسترۋكسيالاۋ ءۇشىن الىنادى. تاستاق-2، 5/1 شاعىن اۋدانىنداعى تاعى ءبىر ۋچاسكە ورتاق پايدالانىلاتىن نىسان ءۇشىن الىنادى.
يەلىكتەن شىعارۋ جۇمىستارىنىڭ بارلىعى 2027 جىلعى 31 جەلتوقسانعا دەيىن اياقتالادى دەپ كۇتىلۋدە. بۇدان بولەك، كوكشوقى، 1/10 شاعىن اۋدانىندا ورنالاسقان جالپى اۋدانى 0،9724 گا جەردىڭ 0،1665 گا بولىگىنە «كوكجايلاۋ» تاۋ-شاڭعى كەشەنىنە اپاراتىن جولدى سالۋ ءۇشىن قۇرىلىس كەزەڭىنە، 2029 جىلدىڭ سوڭىنا دەيىن شەكتەۋلى پايدالانۋ قۇقىعى بەلگىلەنەدى.