الماتىدا جاس تۇرعىن دۋش كابيناسىن تازالاپ ءجۇرىپ، تازارتقىش زاتتىڭ بۋىنان ۋلاندى. وقيعا ءۇي جيناۋ كەزىندە بولدى: قىز گەلدى بەتىنە جاعىپ، گۋبكامەن كىردى كەتىرە باستاعان. بىرنەشە مينۋتتان كەيىن ونىڭ كوزى جانا باستاپ، تىنىسى تارىلىپ، باسى اينالىپ، جۇرەك سوعىسى جيىلەدى، دەپ حابارلايدى infohub.kz سايتى.
Mash Telegram-ارناسىنىڭ مالىمەتىنشە، 25 جاستاعى زارداپ شەككەن قىز ەسىن جوعالتقان، ال جەدەل جاردەم كەلگەنگە دەيىن وعان كورشىسى — دارىگەر كومەك كورسەتكەن. شاقىرتۋعا كەلگەن مەديكتەر اۋرۋحاناعا جاتقىزۋدى ۇسىنعان، ءبىراق قىز باس تارتقان. الايدا كوپ ۇزاماي ونىڭ جاعدايى كۇرت ناشارلاپ، ونى ايتەۋىر اۋرۋحاناعا جەتكىزگەن، وندا قاجەتتى پروسەدۋرالار، سونىڭ ىشىندە تامشىلاتىپ ەنگىزۋ جانە وتتەگى تەراپياسى جۇرگىزىلگەن. دارىگەرلەر حيميالىق زاتتىڭ بۋىمەن ۋلانۋ دياگنوزىن قويعان.
الماتى قوعامدىق دەنساۋلىق ساقتاۋ باسقارماسى ناۋقاستىڭ «حيميالىق زات بۋىمەن جەڭىل دارەجەدە ۋلانۋ» دياگنوزىمەن اۋرۋحاناعا جات قىزىلعانىن راستادى. قابىلداۋ بولىمشەسىندە ونى مۋلتيديسيپلينارلىق توپ قاراپ، شۇعىل كومەك كورسەتىپ، تۇرعىلىقتى جەرى بويىنشا ەمحانادا امبۋلاتوريالىق باقىلاۋعا شىعارعان.
مەديكتەر ناشار جەلدەتىلەتىن بولمەدە تۇرمىستىق حيميانى قولدانۋ تىنىس جولدارىنىڭ تىتىركەنۋىن، برونحوسپازمدى، ءتىپتى ۇزاق اسەر ەتكەندە وكپەنىڭ زاقىمدالۋىن تۋدىرۋى مۇمكىن ەكەنىن ەسكەرتەدى. اسىرەسە، قۇرامىندا حلورى بار زاتتاردى قىشقىلدارمەن نەمەسە اممياكپەن ارالاستىرۋ ءقاۋىپتى، بۇل ۋلى گازداردىڭ بولىنۋىنە اكەلەدى.
№4 قالالىق اۋرۋحانانىڭ قابىلداۋ بولىمشەسىنىڭ مەڭگەرۋشىسى ماگادين حايرويەۆ العاشقى بەلگىلەر پايدا بولعاندا دەرەۋ تازالاۋدى توقتاتىپ، تازا اۋاعا شىعۋدى ۇسىنادى. جاعداي جاقسارسا دا، بولمە تولىق جەلدەتىلگەنشە وعان قايتا ورالماۋ كەرەك. جەلدەتۋدى كۇشەيتۋ ءۇشىن تەرەزەلەر مەن ەسىكتەردى اشۋ قاجەت.
دارىگەر الاڭداتارلىق بەلگىلەرگە نازار اۋدارادى: كۇشەيگەن جوتەل، تاماقتىڭ قىجىلداۋى جانە جانۋى، كوزدىڭ تىتىركەنۋى، ىسقىرىقتى تىنىس، ەنتىگۋ، باس اينالۋ جانە جۇرەك اينۋ. زات تەرىگە نەمەسە كوزگە تۇسكەن جاعدايدا ونى تەز ارادا كەتىرۋ كەرەك: سۋمەن جۋۋ، كيىمدى شەشۋ، كوزدى كەمىندە 15 مينۋت شايۋ.
مەديكتەر ءارتۇرلى تازارتقىش زاتتاردى، اسىرەسە قۇرامىندا حلورى بار زاتتاردى قىشقىلدارمەن نەمەسە اممياكپەن ارالاستىرۋعا بولمايتىنىن اتاپ وتەدى — بۇل ۋلى قوسىلىستاردىڭ تۇزىلۋىنە جانە تىنىس جولدارىنىڭ اۋىر زاقىمدالۋىنا اكەلۋى مۇمكىن. ەگەر تازا اۋاعا شىققاننان كەيىن بەلگىلەر ساقتالسا نەمەسە كۇشەيسە، مەديسينالىق كومەك قاجەت. اۋىر بەلگىلەر — ايقىن ەنتىگۋ، تۇنشىعۋ، كەۋدەدەگى اۋىرسىنۋ، ەس-تۇستىڭ بۇزىلۋى — كەزىندە دەرەۋ جەدەل جاردەم شاقىرىپ، زارداپ شەككەنگە تىنىشتىق پەن تازا اۋا اعىنىن قامتاماسىز ەتۋ كەرەك.