الماتىلىق تۇرعىن پاتەر، تۇرعىن ەمەس ءۇي-جاي جانە تۇراق ورنىن تولىق تولەپ، نىساننىڭ تاپسىرىلۋ مەرزىمى بۇزىلعانى ءۇشىن سوت ارقىلى مەردىگەردەن 10 ملن تەڭگەدەن استام قاراجات ءوندىرىپ الدى. بۇل تۋرالى infohub.kz سايتى حابارلايدى.
جوعارعى سوتتىڭ Telegram-ارناسىندا ءمالىم ەتكەندەي، 2021 جىلى الماتىلىق مەردىگەرمەن پاتەر، تۇرعىن ەمەس ءۇي-جاي جانە تۇراق ورنىن ساتىپ الۋعا الدىن الا شارتتار جاساسقان. ول نىسانداردىڭ قۇنىن تولىق تولەگەن.
«مەردىگەر قۇرىلىس جۇمىستارىن اياقتاپ، نەگىزگى ساتىپ الۋ-ساتۋ شارتتارىن 2023 جىلدىڭ سوڭىنا دەيىن جاساسۋعا مىندەتتەنگەن. الايدا ءىس جۇزىندە نىسان تەك 2024 جىلدىڭ قازانىندا پايدالانۋعا بەرىلدى. قابىلداۋ-تاپسىرۋ اكتىلەرى 2025 جىلدىڭ قاڭتارىندا قول قويىلىپ، نەگىزگى ساتىپ الۋ-ساتۋ شارتتارى 2025 جىلدىڭ ناۋرىزىندا جاسالدى»، — دەدى سوتتا.
وسىعان بايلانىستى ساتىپ الۋشى سوتقا جۇگىنىپ، مەردىگەردىڭ نىساندى پايدالانۋعا بەرۋ جانە نەگىزگى شارتتاردى جاساسۋ مەرزىمدەرىن بۇزعانىن كورسەتىپ، مىندەتتەمەلەردى ورىنداۋ مەرزىمى بۇزىلعانى ءۇشىن ءوسىمپۇل ءوندىرۋدى تالاپ ەتتى.
ايتا كەتەيىك، ءبىرىنشى جانە اپەللياسيالىق ساتىلارداعى سوتتار ازاماتتىق كودەكستىڭ 353-بابى بۇل داۋعا قولدانىلمايدى دەپ، تالاپ قويۋدى قاناعاتتاندىرۋدان باس تارتقان. سەبەبى باستاپقى مىندەتتەمە اقشالاي بولماعان، ال نەگىزگى شارتتار جاسالعاننان كەيىن الدىن الا شارتتار بويىنشا مىندەتتەمەلەر توقتاتىلادى.
«ازاماتتىق ىستەر جونىندەگى كاسساسيالىق سوت بۇل تاسىلمەن كەلىسپەدى. سوت نەگىزگى شارتتىڭ جاسالۋى ونىڭ جاسالۋىنا دەيىن جىبەرىلگەن شارتتاردى بۇزعانى ءۇشىن جاۋاپكەرشىلىكتەن بوساتپايتىنىن اتاپ ءوتتى. ساتىپ الۋشى تولەم بويىنشا ءوز مىندەتتەمەلەرىن تولىق جانە ۋاقتىلى ورىنداعان، ال مەردىگەر نىسانداردى پايدالانۋعا بەرۋ جانە نەگىزگى شارتتاردى جاساسۋ مەرزىمدەرىن بۇزعان»، — دەپ قوستى جوعارعى سوتتا.
شارتتاردا مەردىگەردىڭ جاۋاپكەرشىلىگى قاراستىرىلعانى ناقتىلاندى: مەرزىمى كەشىكتىرىلگەن ءاربىر كۇن ءۇشىن ساتۋشى جىلجىمايتىن م ۇلىك قۇنىنىڭ 0،1%-ى مولشەرىندە ءوسىمپۇل ەسەپتەيدى، ءبىراق 10%-دان اسپايدى.
كاسساسيالىق سوت ءوسىمپۇل مىندەتتەمەنى تيىسىنشە ورىنداماعانى ءۇشىن، سونىڭ ىشىندە مەرزىمدەردى بۇزعانى ءۇشىن جاۋاپكەرشىلىك نىسانى ەكەنىن ءتۇسىندىردى. باستاپقى مىندەتتەمەنىڭ اقشالاي سيپاتتا بولماۋى ساتىپ الۋشىنى ءوسىمپۇل الۋ قۇقىعىنان ايىرمايدى.
ناتيجەسىندە ءبىرىنشى جانە اپەللياسيالىق ساتىلارداعى سوت اكتىلەرى جويىلىپ، 10،5 ملن تەڭگە ءوسىمپۇل ءوندىرۋ تۋرالى جاڭا شەشىم شىعارىلدى.