اباي وبلىسىندا توعىز جاسار بالا اتا-اناسىن الداپ، ءۇي اۋلاسىنداعى قوسالقى قۇرىلىستا جاسىرىنىپ قالدى. كەيىن بالا بۇل ارەكەتىن پرانك دەپ اتادى، دەپ حابارلايدى infohub.kz.
وبلىستىق پوليسيا دەپارتامەنتىنىڭ مالىمەتىنشە، وقيعا ماقانشى اۋدانىندا بولعان. ءتورتىنشى سىنىپ وقۋشىسى ساعات 13:00 شاماسىندا مەكتەپكە كەتكەن، ءبىراق ساباقتان كەيىن ۇيگە ورالماعان. اناسى بالانى ءوزى ىزدەپ، ساعات 20:30 شاماسىندا ءۇيدىڭ جانىنان ءبىر جازبا تاۋىپ العان: «انا، اكە، مەنى ىزدەمەڭدەر، مەن ءبىر كۇنى ورالامىن».
تۋىستارى دەرەۋ پوليسياعا حابارلاسقان. كەلگەن قىزمەتكەرلەر توپتارعا ءبولىنىپ، اۋلالار مەن ماڭايداعى اۋماقتى تەكسەرە باستاعان. 10 مينۋتتان كەيىن بالا ءوز ءۇيىنىڭ اۋلاسىنداعى قوسالقى قۇرىلىستان شىققان. مەكتەپتەن كەيىن ۇيگە كەلىپ، سول جەرگە جاسىرىنىپ، ۇيىقتاپ كەتكەنى انىقتالعان. بالا پوليسيا كولىكتەرىنىڭ سيرەناسىنان ويانىپتى.
توڭىپ، قورقىپ كەتكەن وقۋشى دەرەۋ اناسىنا جۇگىرگەن. ول اتا-اناسىنا پرانك جاساعىسى كەلگەنىن ايتقان. اباي وبلىسى پوليسيا دەپارتامەنتى اتا-انالاردى بالالارعا قاۋىپسىزدىك ەرەجەلەرىن ۇنەمى ەسكە سالىپ، مۇنداي «ازىلدەردىڭ» اۋىر سالدارى بولۋى مۇمكىن ەكەنىن تۇسىندىرۋگە شاقىرادى.