اقتوبە وبلىسىندا اۋىل شارۋاشىلىعى وندىرىستىك كووپەراتيۆتەرىنىڭ باسشىسى بيۋدجەتتەن 91 ملن تەڭگەدەن استام سۋبسيديانى الاياقتىق جولمەن الىپ، كىنالى دەپ تانىلدى، دەپ حابارلايدى infohub.kz سايتى.
NUR.KZ باس پروكۋراتۋراعا سىلتەمە جاساپ حابارلاۋىنشا، سۋبسيديالاردى زاڭسىز الۋ فاكتىلەرىن مارتوك اۋدانىنىڭ پروكۋراتۋراسى بيۋدجەت قاراجاتىنىڭ ماقساتتى جانە ءتيىمدى جۇمسالۋىن تەكسەرۋ بارىسىندا انىقتاعان. ءسوز ەرەكشە ءىرى مولشەردەگى الاياقتىق تۋرالى بولىپ وتىر.
قاداعالاۋ ورگانىنىڭ رەسمي Telegram-ارناسىندا بىلاي دەلىنگەن: «"توميريس-2019"، "مارتوك-2030" جانە "تەڭگە-2030" اۋىل شارۋاشىلىعى وندىرىستىك كووپەراتيۆتەرىنىڭ باسشىسى 2023–2025 جىلدار ارالىعىندا بايۋ ماقساتىندا كورىنەۋ جالعان مالىمەتتەر ەنگىزۋ ارقىلى سۋبسيديالاردى الاياقتىق جولمەن زاڭسىز الىپ، مەملەكەتكە 91 ملن تەڭگەدەن استام شىعىن كەلتىرگەنى انىقتالدى».
وسى فاكتى بويىنشا اۋدان پروكۋراتۋراسى قازاقستان رەسپۋبليكاسى قىلمىستىق كودەكسىنىڭ 190-بابى 4-بولىگىنىڭ 2-تارماعى بويىنشا قىلمىستىق ءىس تىركەدى. ايەل سوتقا بەرىلدى.
مارتوك اۋداندىق سوتىنىڭ ۇكىمىمەن ول كىنالى دەپ تانىلدى. وعان 6 جىل 8 ايعا باس بوستاندىعىنان ايىرۋ جازاسى تاعايىندالىپ، كوممەرسيالىق ۇيىمداردا باسشىلىق لاۋازىمداردى اتقارۋ قۇقىعىنان ايىرىلدى. سوتتالعان ايەلدىڭ كامەلەتكە تولماعان بالالارى بولۋىنا بايلانىستى جازانى وتەۋ كەيىنگە شەگەرىلدى.