اقتوبە وبلىسىندا ءوز كۇيەۋ بالاسىن ولتىرۋگە وقتالعان بۇرىنعى پوليسەيگە ۇكىم شىقتى. ول 10 جىلعا باس بوستاندىعىنان ايىرىلدى، دەپ حابارلايدى «دياپازون»، ونىڭ اقپاراتىن infohub.kz سايتى ۇسىندى.
قىلمىستىق ءىس ماتەريالدارىنا سايكەس، قايعىلى وقيعا حرومتاۋداعى دەمالىس بازاسىندا بولعان. 32 جاستاعى ۋچاسكەلىك ينسپەكتوردىڭ كومەكشىسى توي-تومالاقتان كەيىن قىزمەتكە كىرىسۋى كەرەك بولعاندىقتان، قاسىندا ماكاروۆ تاپانشاسى بولعان.
توي-تومالاققا پوليسەيدىڭ اپكەسىنىڭ جۇبايى دا قاتىسقان. ىشىمدىك ءىشۋ بارىسىندا ول ايەلىن ۇرىپ-سوققانىن جانە بۇدان بىلاي دا جالعاستىراتىنىن مويىنداعان. وسىنداي سوزدەردى ەستىگەن ۋچاسكەلىك ينسپەكتوردىڭ كومەكشىسى قىزمەتتىك قارۋىن الىپ، كۇيەۋ بالاسىنا تىكەلەي اتقىلاي باستاعان.
ءتورتىنشى وقتا گيلزا تاپانشاعا كەپتەلىپ قالعان. زارداپ شەككەن ەر ادام كەۋدەسى مەن ىشىنەن جاراقات الىپ، رەانيماسيا بولىمىنە جات قىزىلعان.
جارالى ەر ادام امان قالدى، ال بۇرىنعى پوليسەي ولتىرۋگە وقتالۋ ايىبىمەن سوت ورىندىعىنا وتىردى. سوتتالۋشىنىڭ ءوزى جانجال كۇيەۋ بالاسىنىڭ جۇمىستان سۇرانىپ، كومپانيامەن بىرگە دەمال دەگەن تالابىنان تۋىنداعانىن ايتقان.
سوت وسى رەزونانستى ءىس بويىنشا ۇكىم شىعاردى. ولتىرۋگە وقتالۋ ءۇشىن ەكس-پوليسەي 10 جىلعا باس بوستاندىعىنان ايىرىلدى.
ەسكە سالايىق، وسى جىلدىڭ ناۋرىز ايىنىڭ سوڭىندا اقتوبە وبلىسىندا اتىس بولعانى تۋرالى اقپارات تاراعان، وقتى پوليسەي قىزمەتكەرى اتقان دەپ بولجانعان. 36 جاستاعى زارداپ شەگۋشى حرومتاۋ اۋداندىق اۋرۋحاناسىنىڭ رەانيماسياسىنا جەتكىزىلگەن. پوليسيا قىلمىستىق ءىس قوزعاعان.
كەيىن وقيعا حرومتاۋداعى دەمالىس بازاسىندا بولعانى بەلگىلى بولدى. الدىن الا دەرەكتەر بويىنشا، جانجال كەزىندە پوليسەي قارسىلاسىنا قىزمەتتىك تاپانشاسىنان ءتورت رەت وق اتقان. سونداي-اق جانجالعا قاتىسۋشىلار تۋىس ەكەنى حابارلانعان. جابىرلەنۋشى قايىن اعاسىن كەشىرگەن.