ارىستا تۇرعىن ءۇيدىڭ اۋلاسىنداعى ورىندىققا كولىك سوعىلۋىنان جۇكتى ايەل مەن ەكى بالا قازا تاپقان ءىس بويىنشا سوت پروسەسى اياقتالۋعا جاقىن، دەپ حابارلايدى infohub.kz سايتى.
جەتىنشى ارنانىڭ مالىمەتىنشە، تۇركىستاندا ماۋسىم ايىندا بولعان اپاتتىق وقيعاعا قاتىستى تەرگەۋ اياقتالۋعا جاقىن. جول اپاتىنان ءۇش ادام قازا تاپتى، ونىڭ ىشىندە بولاشاق انا دا بار. ايىپتالۋشى — ءمۇعالىم، ول الكوگولدىك ماساڭ كۇيدە كولىك جۇرگىزگەن دەگەن ايىپ تاعىلۋدا.
قايتىس بولعانداردىڭ تۋىستارى سوت وتىرىستارىندا ايىپتالۋشىنى كەشىرمەيتىنىن مالىمدەپ، وعان ەڭ اۋىر جازا تاعايىنداۋدى تالاپ ەتتى. سول ماۋسىم كۇنى بىرنەشە وتباسىنىڭ ءومىرى وزگەردى: ايىپتالۋشىنىڭ ءوزى جانە اۋلادا دەمالىپ جاتقان ەكى وتباسى جاقىندارىنان ايىرىلدى. سوققى سالدارىنان ەكى بالا مەن جۇكتى ايەل قازا تاپتى. تاعى ءبىر ادام اۋىر جاراقات الدى، ەكەۋى ورتاشا اۋىرلىقتاعى جاراقاتپەن اۋرۋحاناعا جات قىزىلدى.
مەملەكەتتىك ايىپتاۋشى ايىپتالۋشىعا 10 جىل باس بوستاندىعىنان ايىرۋ جازاسىن سۇرادى. «قىلمىستىق كودەكستىڭ 58-بابىنىڭ ەكىنشى بولىگىنە سايكەس، نەعۇرلىم جەڭىل جازانى نەعۇرلىم اۋىر جازاعا ءسىڭىرۋ ارقىلى تۇپكىلىكتى 10 جىل باس بوستاندىعىنان ايىرۋ جازاسىن تاعايىنداۋدى سۇرايمىن، سونداي-اق كولىك قۇرالىن باسقارۋ قۇقىعىنان ءومىر بويىنا ايىرۋدى سۇرايمىن. ونىڭ اسىراۋىندا 14 جاسقا تولماعان قىزى بولعاندىقتان، تاعايىندالعان جازانىڭ ورىندالۋىن ءبىر جىلعا كەيىنگە قالدىرۋدى سۇرايمىن»، — دەدى پروكۋرور اقجارقىن ورازباي سوتقا.
ءسوز سايىسى كەزىندە وقيعاعا قاتىسۋشىلار كوز جاسىن تىيا المادى. 30 جاستاعى دانا ۋسيمبەك پەن ونىڭ ءبىر جاسار بالاسى اۋىر جاراقات الدى. وقيعا ورنىندا قازا تاپقان بەس جاسار قىز ونىڭ قىزى ەدى. «ءبىز وسىرىپ-تاربيەلەگەن بالامىزدان ايىرىلدىق. مەن ءوزىم مۇگەدەك بولىپ قالدىم. مەنىڭ دەنساۋلىعىم دا، بالامنىڭ دەنساۋلىعى دا قالپىنا كەلمەيدى. قىزىمدى مەكتەپكە اپارار ەدىم، ەندى ونىڭ قابىرىنە بارىپ دۇعا وقيمىن»، — دەدى جابىرلەنۋشى دانا ۋسيمبەك.
ايىپتالۋشىنىڭ ءوزى سوتتان جازاسىن جەڭىلدەتۋدى سۇراپ، مۇگەدەك قىزىن تاربيەلەپ وتىرعانىن العا تارتتى. ول ىستەگەن ىسىنە وكىنەتىنىن ءبىلدىرىپ، كەشىرىم سۇرادى. بۇل ءىس بويىنشا ۇكىم دۇيسەنبى، 7 قىركۇيەكتە جاريالانادى.
ەسكە سالايىق، قايعىلى وقيعا ماۋسىم ايىندا تۇركىستان وبلىسىنىڭ ارىس قالاسىندا بولعان: جەكە ءۇيدىڭ جانىنداعى ورىندىقتا ايەلدەر مەن بالالار وتىرعان كەزدە ولارعا جوعارى جىلدامدىقپەن كولىك سوعىلعان. سوققى سالدارىنان ادامدار كىرپىش قورشاۋعا قىسىلىپ، قورشاۋ دا قۇلاعان. 29 جاستاعى جۇكتى ايەل، ونىڭ 2 جاسار ۇلى جانە كورشىلەردىڭ 5 جاسار قىزى قازا تاپتى. كەيىن انىقتالعانداي، كولىكتى جەرگىلىكتى مەكتەپتىڭ 52 جاستاعى ءمۇعالىمى باسقارعان، ول ساراپتاما بويىنشا الكوگولدىك ماساڭ كۇيدە بولعان.