تۇركىستان وبلىسىندا 52 جاستاعى ارىس تۇرعىنىنا ۇكىم شىعارىلدى. ول ماساڭ كۇيىندە كولىك جۇرگىزىپ، التى ادامدى قاعىپ كەتكەن. سونىڭ سالدارىنان ەكى بالا مەن جۇكتى ايەل قازا تاپتى، دەپ حابارلايدى infohub.kz.
بيبينۋر قاسىموۆا مەكتەپتە ءمۇعالىم بولىپ جۇمىس ىستەگەن، بوس ۋاقىتىندا جەكە تاكسيمەن اينالىسقان. قايعىلى وقيعا بولعان كۇنى ول رۋلگە ماس كۇيىندە وتىرىپ، كولىك باسقارۋدى قولعا الماي، ءۇيدىڭ جانىنداعى ورىندىقتا وتىرعان ادامداردى قاعىپ كەتكەن. جول اپاتى سالدارىنان ەكى بالا مەن جۇكتى ايەل قازا تاۋىپ، تاعى ءۇش ادام جاراقات الىپ اۋرۋحاناعا جەتكىزىلدى.
سوت قاسىموۆانى توعىز جىلعا باس بوستاندىعىنان ايىرىپ، كولىك قۇرالدارىن باسقارۋ قۇقىعىنان ءومىر بويىنا ايىردى. سونداي-اق، ول زارداپ شەككەندەرگە 35 ميلليون تەڭگە كولەمىندە وتەماقى تولەۋگە مىندەتتەلدى. الايدا، كامەلەتكە تولماعان بالاسى بولعاندىقتان، جازاسىن وتەۋ ءبىر جىلعا كەيىنگە شەگەرىلدى.
قازا تاپقانداردىڭ تۋىستارى ۇكىمدى تىم جەڭىل دەپ سانايدى. «ءبىزدىڭ وتباسى بىردەن ءۇش ادامىنان ايىرىلدى. كەلىنىمىز بەن نەمەرەمىز قازا تاپتى، ول ءالى جۇكتى ەدى. ءۇش ادامنىڭ ءومىرى ءۇشىن نەبارى توعىز جىل — بۇل از»، — دەدى زارداپ شەككەن اعايشا ماناتوۆا. ول وتباسى ءالى كۇنگە دەيىن جاقىندارىنىڭ قازاسىن اۋىر سەزىنەتىنىن جانە سوت شەشىمىنە كوڭىلى تولمايتىنىن ايتتى.
بۇعان دەيىن جۇرگىزۋشى وقيعا ورنىنان قاشىپ كەتكەنى، ءبىراق كەيىن ۇستالىپ، ۋاقىتشا ۇستاۋ يزولياتورىنا قامالعانى حابارلانعان بولاتىن.