قازاقستاندىق اكتريسا ءارى پروديۋسەر اسەل ءسادۋاقاسوۆا Instagram پاراقشاسىندا جازىلۋشى ايەلدەرمەن ارتىق سالماقتان ارىلۋعا كومەكتەسكەن تاماقتانۋ ەرەجەلەرىمەن ءبولىستى، دەپ حابارلايدى infohub.kz سايتى.
ءسادۋاقاسوۆانىڭ ايتۋىنشا، وسى ەرەجەلەردىڭ ارقاسىندا ول 12 كگ سالماق تاستاعان. 5 جىلدان بەرى پايدالى ادەتتەرگە سۇيەنىپ، وزىنە قولايلى سالماقتى ۇستاپ وتىر.
«№1 ەرەجە. بۇل — سۋ. بۇرىن مەن گازدالعان سۋسىن، كومپوت، مورس، فرەش سياقتى بارلىق سۋسىندى ىشەتىنمىن، ال تازا سۋدى وتە از ءىشتىم. كۇنىنە ەڭ كوبى ءبىر ستاقان. بىرتىندەپ بۇل ادەتتى وزگەرتە باستادىم»، — دەدى ول.
ەندى اكتريسا ءتاتتى سۋسىنداردان باس تارتىپ، تەك سۋ ىشەدى. كۇنىنە 1،5–2 ليتر سۋ ىشەدى.
«№2 ەرەجە. تاماق جەگەن كەزدە سۋ ىشپەيمىن. №3 ەرەجە. سوڭعى تاماقتى ۇيقىعا 3-4 ساعات قالعاندا جەيمىن. بۇكىل اعزاعا دەمالىس بەرۋگە تىرىسامىن. №4 ەرەجە. بىرتىندەپ ۇننان جاسالعان جانە ءتاتتى تاعامداردى شەكتەدىم»، — دەپ ءبولىستى اسەل ءسادۋاقاسوۆا.