«قازاۆتوجول» ۇلتتىق كومپانياسى قازاقستانداعى جول توسەمىنە تونەتىن باستى قاۋىپتەردىڭ ءبىرى — ارتىق جۇك تيەلگەن جۇك كولىكتەرىن كورسەتەتىن بەينەروليك جاريالادى، دەپ حابارلايدى infohub.kz سايتى.
بۇعان دەيىن «قازاۆتوجول» اۋىر جۇك كولىكتەرى اباي وبلىسىنداعى جاڭا تراسساعا، اتاپ ايتقاندا تالدىقورعان — قالباتاۋ — وسكەمەن رەسپۋبليكالىق ماڭىزى بار اۆتوموبيل جولىنا زالال كەلتىرىپ جاتقانىن حابارلاعان بولاتىن. ەندى كومپانيا جولداردىڭ جاي-كۇيىنە تىكەلەي ءقاۋىپ توندىرەتىندەردى كورنەكى تۇردە كورسەتۋدى ءجون كوردى.
جاريالانعان كادرلاردا كارەردەن قۇرىلىس ماتەريالدارىنا تولى شاناقتارىمەن شىعىپ كەلە جاتقان جۇك كولىكتەرىنىڭ اۆتوماتتاندىرىلعان ولشەۋ ستانسياسىنا (ءاوس) جاقىنداعاندا، جولدىڭ ءجۇرۋ بولىگىنەن جول جيەگىنە بۇرىلىپ، سالماق باقىلاۋ جۇيەسىن اينالىپ وتەتىنى كورىنەدى.
«بۇل جۇك كولىكتەرىندە ارتىق جۇك بار. ءدال سولار اسفالتتىڭ باستى جاۋلارىنىڭ ءبىرى. اۋىر سالماقتى كولىك جول توسەمىن بۇزادى، جارىقتاردىڭ، كولەيلەردىڭ جانە دەفورماسيالاردىڭ پايدا بولۋىن تەزدەتەدى»، — دەپ اتاپ ءوتتى «قازاۆتوجولدا».
كومپانيادا ءاوس بيزنەسكە كەدەرگى ەمەس، جۇك تاسىمالىن شەكتەۋ ارەكەتى ەمەس، مەملەكەت قاراجاتى ەسەبىنەن سالىنعان جولداردى قورعاۋ قۇرالى ەكەنىن اتاپ كورسەتتى.
«بۇل تراسساداعى جوعارى جۇكتەمەنىڭ سالدارىن ءقازىردىڭ وزىندە جويۋعا تۋرا كەلىپ وتىر. قىسقا مەرزىم ىشىندە قالپىنا كەلتىرۋ جۇمىستارى 10 مىڭ شارشى مەتردەن استام اسفالتبەتون توسەمىن قامتىدى. زاقىمدانۋدىڭ باستى سەبەپتەرىنىڭ ءبىرى — ارتىق جۇك تيەلگەن كولىكتەردىڭ قوزعالىسى. ءبىراق ءاوس-تى جول جيەگىمەن اينالىپ ءوتىپ، جۇك كولىكتەرى كوپ توننالى اۆتوموبيلدەردىڭ جۇيەلى قوزعالىسىنا ارنالماعان جول ەلەمەنتتەرىنە قوسىمشا جۇكتەمە تۇسىرۋدە»، — دەپ ءتۇسىندىردى ۇيىمدا.
«قازاۆتوجول» كارەر يەلەرىنە، جۇك تاسىمالداۋشىلارعا جانە مۇنداي كولىكتى پايدالاناتىن ۇيىمدارعا باقىلاۋدى اينالىپ ءوتۋ جولدارىن ىزدەمەي، سالماق پەن وستىك نورمالاردى ساقتاۋعا شاقىرۋمەن ۇندەۋ جاسادى.
«ەلگە جاڭا جولدار، ينفراقۇرىلىمدىق نىساندار جانە جۇمىس ىستەپ تۇرعان بيزنەس قاجەت. ءبىراق ءبىر باعىتتىڭ دامۋى ەكىنشىسىنىڭ مەرزىمىنەن بۇرىن قيراۋى ەسەبىنەن بولماۋى كەرەك»، — دەلىنگەن حابارلامادا.