استانانىڭ التى تۇرعىنى جۇرگىزۋشى كۋالىگىن الۋعا كومەكتەسەمىن دەپ ۋادە بەرگەن الاياقتىڭ قۇربانى بولدى. ولار وعان بارلىعى 2،3 ميلليون تەڭگە بەرگەن، الايدا ەر ادام ءوز مىندەتتەمەلەرىن ورىنداماعان، دەپ حابارلايدى infohub.kz.
پروكۋراتۋرانىڭ مالىمەتىنشە، الاياق ازاماتتاردى تانىستارى ارقىلى ماسەلەنى شەشە الاتىنىنا سەندىرگەن. اقشانى العان سوڭ، ول ەشقانداي قىزمەت كورسەتپەي، ونى جەكە قاجەتتىلىكتەرىنە جۇمساعان.
سوت وتىرىسى بارىسىندا پروكۋرور ايىپتالۋشىنىڭ كىناسىن تولىق دالەلدەدى. سوت ونىڭ شىن جۇرەكتەن مويىنداۋىن جانە زالالدىڭ ءبىر بولىگىن وتەگەنىن ەسكەرىپ، وعان 3 جىل 6 اي مەرزىمگە باس بوستاندىعىن شەكتەۋ جازاسىن تاعايىندادى. سونىمەن قاتار، سوتتالعانعا پروباسيالىق باقىلاۋ بەلگىلەنىپ، ول جازا مەرزىمى ىشىندە جىل سايىن 100 ساعات ءماجبۇرلى ەڭبەككە تارتىلاتىن بولادى.
سونداي-اق، ەر ادامعا ءبىرقاتار مىندەتتەر جۇكتەلدى: پروباسيا قىزمەتىن حاباردار ەتپەي تۇرعىلىقتى جەرىن جانە جۇمىسىن اۋىستىرۋعا تىيىم سالۋ، الكوگولدى تۇتىنۋمەن بايلانىستى ويىن-ساۋىق ورىندارىنا بارۋعا تىيىم سالۋ، جۇمىسى بولماعان جاعدايدا جۇمىسسىز رەتىندە تىركەلۋ مىندەتى، سونداي-اق تۇنگى ۋاقىتتا (ساعات 22:00-دەن 06:00-گە دەيىن) ۇيدەن تىس جەردە بولۋعا شەكتەۋ قويۋ.
ۇكىم زاڭدى كۇشىنە ەنگەن. استانا پروكۋراتۋراسى ازاماتتاردى ساق بولۋعا جانە زاڭنان تىس جولمەن ماسەلەلەردى شەشۋگە ۋادە بەرەتىن ادامدارعا اقشا بەرمەۋگە، تەك مەملەكەتتىك قىزمەتتەردى الۋدىڭ رەسمي تاسىلدەرىن پايدالانۋعا شاقىرادى.