استانادا كۇز-قىس ماۋسىمىنا جانە جرۆي مەن تۇماۋمەن سىرقاتتانۋشىلىقتىڭ كۇتىلەتىن وسۋىنە دايىندىق قىزۋ ءجۇرىپ جاتىر. تۇرعىنداردى ۆاكسيناسيالاۋ قىركۇيەك ايىنىڭ ورتاسىندا باستالادى، دەپ حابارلايدى infohub.kz سايتى.
15 قىركۇيەكتەن باستاپ قازاقستاندا تۇماۋعا قارسى ۆاكسيناسيا ناۋقانى باستالادى. ەڭ الدىمەن تاۋەكەل توبىنا جاتاتىن ازاماتتار ەگىلەدى: مەديسينا قىزمەتكەرلەرى، سوزىلمالى اۋرۋلارى بار ادامدار، بالالار مەن وقۋشىلار، جۇكتى ايەلدەر، قارت ادامدار، سونداي-اق جابىق مەكەمەلەر مەن الەۋمەتتىك قورعاۋ جۇيەسىندەگى تۇرعىندار.
ەلوردانىڭ مەديسينالىق ۇيىمدارىندا جرۆي بەلگىلەرى بار ناۋقاستاردى قابىلدايتىن فيلتر-كابينەتتەر مەن جەدەل جاردەم كابينەتتەرى دايىندالعان. مۇندا تەكسەرۋدەن ءوتىپ، قاجەتتى كومەك الۋعا بولادى. بۇل كابينەتتەردىڭ جۇمىس كەستەسى: جۇمىس كۇندەرى — 08:00-دەن 20:00-گە دەيىن، دەمالىس جانە مەرەكە كۇندەرى — 08:00-دەن 18:00-گە دەيىن.
سونىمەن قاتار، العاشقى مەديسينالىق-سانيتارلىق كومەك ۇيىمدارىندا ۇيدە كومەك كورسەتەتىن ءموبيلدى بريگادالار جۇمىس ىستەيدى. جرۆي، تۇماۋ جانە ىقتيمال اسقىنۋ بەلگىلەرى بار جۇكتى ايەلدەر مەن ءبىر جاسقا دەيىنگى بالالارعا ەرەكشە نازار اۋدارىلادى.
ستاسيونارلار گوسپيتاليزاسيا سانىنىڭ ارتۋى جاعدايىنا ارنالعان جوسپارلاردى دا ازىرلەدى. قوسىمشا ينفەكسيالىق توسەكتەردى ورنالاستىرۋ قاراستىرىلعان، دارى-دارمەك قورى جاسالعان، توسەك قورىنىڭ تولتىرىلۋىنا تۇراقتى باقىلاۋ ۇيىمداستىرىلعان. ەگەر ينفەكسيالىق جانە رەانيماسيالىق توسەكتەر بەلگىلەنگەن جۇكتەمە دەڭگەيىنە جەتسە، اۋرۋحانالاردا قوسىمشا ورىندار ورنالاستىرىلادى.
ءبىلىم بەرۋ ۇيىمدارىنا قاتىستى جەكە شارالار قاراستىرىلعان. مەكتەپتەر مەن بالاباقشالاردا كۇندەلىكتى كەلۋ مونيتورينگى جانە «تاڭعى فيلتر» جۇرگىزىلەدى. ناۋقاس بالالار انىقتالعان جاعدايدا، ولارمەن بايلانىستا بولعاندارعا مەديسينالىق باقىلاۋ ۇيىمداستىرىلادى. ەگەر ءبىر سىنىپتاعى وقۋشىلاردىڭ 30 پايىزى نەمەسە ودان كوبى اۋىرسا، سىنىپتى قاشىقتىقتان وقىتۋ فورماتىنا اۋىستىرۋ مۇمكىندىگى قاراستىرىلادى.
مەديسينالىق ۇيىمداردىڭ ەپيدەميالىق ماۋسىمعا دايىندىعى سانيتارلىق-ەپيدەميولوگيالىق قىزمەت تاراپىنان 10 قىركۇيەككە دەيىن باعالانادى. جرۆي، تۇماۋ جانە COVID-19 سىرقاتتانۋشىلىعىنىڭ مونيتورينگى جۇرگىزىلۋدە، ماۋسىمدىق ءوسۋ كەزەڭىندە باقىلاۋ كۇشەيتىلەدى.
دارىگەرلەر ەلوردا تۇرعىندارىن نەگىزگى الدىن الۋ شارالارىن ساقتاۋعا شاقىرادى: ادام كوپ جينالاتىن جەرلەردە ماسكا كيۋ، قولدى ۇنەمى جۋۋ، ءۇي-جايلاردى جەلدەتۋ جانە سىرقاتتانۋشىلىق وسكەن كەزەڭدە ادام كوپ جەرلەرگە بارۋدى مۇمكىندىگىنشە شەكتەۋ. اۋرۋدىڭ العاشقى بەلگىلەرى — جوعارى تەمپەراتۋرا، جوتەل، تاماق اۋرۋى، مۇرىننىڭ اعۋى نەمەسە السىزدىك پايدا بولعاندا، ءوزىن-وزى ەمدەۋمەن اينالىسپاۋ كەرەك. تۇرعىندارعا تۇرعىلىقتى جەرى بويىنشا ەمحاناعا نەمەسە فيلتر-كابينەتكە ۋاقىتىلى جۇگىنۋ ۇسىنىلادى.