استانا تۇرعىنى الەۋمەتتىك جەلىدە اۆتوبۋس جۇرگىزۋشىسى بالانى اربامەن ەسىككە قىسىپ قالعانىن حابارلادى. ايەلدىڭ ايتۋىنشا، اربا جەرگە قۇلاعان، دەپ حابارلايدى infohub.kz.
dina_ospanova28 ەسىمىمەن تىركەلگەن قولدانۋشى Threads الەۋمەتتىك جەلىسىندە استاناداعى №54 اۆتوبۋستىڭ جۇرگىزۋشىسىنە قاتىستى وقيعانى باياندادى. "بۇگىن، 2026 جىلعى 2 قىركۇيەكتە، شامامەن ساعات 08:00-دە مەن بالاممەن اۆتوبۋسقا وتىرماق بولدىم. اربانى كوتەرىپ كىرگىزبەك كەزدە، جولاۋشىلار كومەكتەستى. سول ساتتە جۇرگىزۋشى ەسىكتى جابا باستادى، ءبىراق ءالى وتىرۋ اياقتالماعان ەدى"، - دەدى ايەل.
ونىڭ ايتۋىنشا، ول جانە باسقا جولاۋشىلار ايعايلاپ، جۇرگىزۋشىنى توقتاتۋدى وتىنگەن، الايدا ەسىك جابىلا بەرگەن. "ناتيجەسىندە اربانىڭ الدىڭعى دوڭگەلەگى اۆتوبۋس ەسىگىنە قىسىلىپ قالدى. وعان قاراماستان، جۇرگىزۋشى جۇرە بەردى. اۆتوبۋس قوزعالعاندا دوڭگەلەك ەسىكتەن شىعىپ كەتىپ، اربا ىشىندەگى بالامەن بىرگە اۋدارىلىپ، جەرگە قۇلادى. سودان كەيىن اۆتوبۋس توقتاماي، ءارى قاراي ءجۇرىپ كەتتى. باقىتىمىزعا وراي، بالا دەنە جاراقاتىن العان جوق، ءبىراق قاتتى قورىقتى"، - دەپ جازدى اۆتور.
استانالىق ايەل "City Transportation Systems" ج ش س باسشىلىعىنان جاعدايدى تەكسەرىپ، كىنالىنى جاۋاپقا تارتۋدى سۇرادى. بۇل جاريالانىمعا "CTS" وكىلى وكسانا اۋباكىروۆا جاۋاپ بەردى. "مۇنداي جاعداي بولعانىنا وكىنەمىز. بالانىڭ زارداپ شەكپەگەنىنە ۇمىتتەنەمىز. تەكسەرىپ جاتىرمىز"، - دەپ جازدى ول.