استانا پوليسەيلەرى ەسىرتكىنىڭ ينتەرنەت-دۇكەنىنىڭ قويماسى بولۋى مۇمكىن جەردى انىقتادى: 33 جاستاعى كۇدىكتىنىڭ پاتەرىنەن تىيىم سالىنعان زاتتار سالىنعان 2 مىڭنان استام ورام تاركىلەندى، دەپ حابارلايدى infohub.kz سايتى.
ەر ادام ەسىرتكىنى ساقتاۋ جانە تاراتۋ كۇدىگىمەن ۇستالدى. جەكە ءتىنتۋ كەزىندە ونىڭ بەلدىك سومكەسىنەن وزىنە ءتان ءيىسى بار سۇر-جاسىل وسىمدىك تەكتەس زات سالىنعان ورامدار تابىلدى. ساراپتاما ونىڭ ماريحۋانا ەكەنىن انىقتادى.
«كۇدىكتىنىڭ پاتەرىن ءتىنتۋ بارىسىندا ءتۇرلى ءتۇستى يزولەنتامەن ورالعان، ۇقساس زاتى بار 2 مىڭنان استام ورام تابىلدى. سونىمەن قاتار، ساراپتاما قورىتىندىسى بويىنشا گاشيش مايى بولىپ تابىلاتىن سۇيىقتىق قۇيىلعان ىدىستار تاركىلەندى. تاركىلەنگەن ەسىرتكىنىڭ جالپى سالماعى ەكى كەلىدەن استى»، — دەپ حابارلادى استانا قالاسىنىڭ پوليسيا دەپارتامەنتى.
پوليسيا مالىمەتىنشە، ۇستالعان ادام مەسسەندجەرلەر ارقىلى تىيىم سالىنعان زاتتاردى تاراتقان ينتەرنەت-دۇكەننىڭ «قويما» قىزمەتىن اتقارعان. مەديسينالىق كۋالاندىرۋ كەزىندە ەر ادامنىڭ ەسىرتكى قولدانعانى دا انىقتالدى.
وسى فاكتى بويىنشا قىلمىستىق ءىس قوزعالدى. ءقازىر پوليسەيلەر ەسىرتكىنىڭ زاڭسىز اينالىمىنا قاتىسى بولۋى مۇمكىن باسقا ادامداردى انىقتاپ جاتىر.
استانا قالاسىنىڭ پوليسيا دەپارتامەنتى تىيىم سالىنعان زاتتاردى ساقتاۋ، وتكىزۋ جانە تاراتۋ قىلمىستىق جاۋاپكەرشىلىككە اكەپ سوعاتىنىن ەسكە سالدى.