استانادا جەكە دەرەكتەر مەن اقشا قاراجاتىن الۋ ماقساتىندا فيشينگتىك SMS جاپپاي جىبەرۋدى ۇيىمداستىرعان قىلمىستىق توپتىڭ ارەكەتىنە جول بەرىلمەدى، دەپ حابارلايدى infohub.kz سايتى.
قارجىلىق مونيتورينگ اگەنتتىگىنىڭ مالىمەتىنشە، وڭتۇستىك-شىعىس ازيا ەلدەرىنىڭ ءبىرىنىڭ ازاماتى بيىلعى قاڭتاردا اقىلى تۇردە جەرگىلىكتى تۇرعىندى قازاقستان اۋماعىندا زاڭسىز ارەكەتتى ۇيىمداستىرۋعا تارتقان دەپ كۇدىكتەنەدى. تەرگەۋ دەرەكتەرى بويىنشا، كەيىن بۇل سحەماعا استاناداعى جابدىقتىڭ جۇمىسىن قامتاماسىز ەتكەن باسقا دا ادامدار قوسىلعان.
قىلمىسكەرلەر ۇيالى بايلانىس بازالىق ستانسياسىن يميتاسيالايتىن جانە وپەراتورلاردىڭ سۇزگى جۇيەلەرىن اينالىپ ءوتىپ، حابارلامالاردى جاپپاي جىبەرۋگە مۇمكىندىك بەرەتىن SMS-بلاستەر قۇرىلعىسىن قولدانعان. ءتورت كۇن ىشىندە Beeline، Kcell جانە Activ ابونەنتتەرىنە بەلگىلى كومپانيالار اتىنان بونۋستاردى ايىرباستاۋ ۇسىنىستارى بار شامامەن 150 مىڭ فيشينگتىك SMS جىبەرىلگەن. سىلتەمە بويىنشا وتكەن پايدالانۋشىلار جالعان سايتقا ءتۇسىپ، وندا جەكە جانە بانكتىك دەرەكتەردى، ونىڭ ىشىندە كارتا رەكۆيزيتتەرىن، CVV جانە راستاۋ SMS-كودىن ەنگىزۋ ۇسىنىلعان.
وسىلايشا، كۇدىكتىلەر ازاماتتاردىڭ قۇپيا اقپاراتى مەن بانكتىك قاراجاتىنا قول جەتكىزگەن. تەرگەۋ انىقتاعانداي، الىنعان SMS-بلاستەر جەدەل-ىزدەستىرۋ ءىس-شارالارى مەن جاسىرىن تەرگەۋ ارەكەتتەرىنە ارنالعان ارنايى تەحنيكالىق قۇرال بولىپ تابىلادى.
وسى فاكتى بويىنشا قىلمىستىق كودەكستىڭ 399-بابىنىڭ 2-بولىگى «اقپاراتتى جاسىرىن الۋدىڭ ارنايى تەحنيكالىق قۇرالدارىن زاڭسىز جاساۋ، ءوندىرۋ، ساتىپ الۋ، وتكىزۋ نەمەسە پايدالانۋ» بويىنشا سوتقا دەيىنگى تەرگەۋ باستالدى. قازىرگى ۋاقىتتا ءتورت كۇدىكتى قاماۋعا الىندى. تەرگەۋ جالعاسۋدا. وزگە اقپارات قازاقستان رەسپۋبليكاسى قىلمىستىق-پروسەستىك كودەكسىنىڭ 201-بابىنا سايكەس جاريا ەتىلمەيدى.