استانانىڭ 19 تۇرعىنى تاپسىرىس بويىنشا جيھاز جاساۋدى ۇسىنعان الاياقتاردىڭ قۇربانى بولدى. جالپى شىعىن 24،6 ملن تەڭگەدەن استى، دەپ حابارلايدى infohub.kz سايتى.
ەلوردادا سوت تاپسىرىس بويىنشا جيھاز جاساۋ كەزىندە الاياقتىققا قاتىستى ەكى ايىپتالۋشىعا ۇكىم شىعاردى. ولاردىڭ ءارقايسىسى التى جىلعا باس بوستاندىعىنان ايىرىلدى.
باس پروكۋراتۋرادا حابارلاعانداي، زارداپ شەككەندەردىڭ ءبىرى Instagram-دا جيھاز جاساۋ تۋرالى جارنامانى كورىپ، كەلىسىمشارت جاساسقان. ولشەمدەردى العاننان كەيىن ول 4،5 ملن تەڭگە كولەمىندە اقشا اۋدارعان. الايدا ودان كەيىن ەكى الاياق بايلانىسقا شىقپاي قويعان.
ولاردىڭ ارەكەتتەرىنەن 19 ازامات زارداپ شەكتى، شىعىن 24،6 ملن تەڭگەدەن استى. سوتتا مەملەكەتتىك ايىپتاۋشى ەكى ايىپتالۋشىنىڭ دا كىناسىن دالەلدەيتىن بارلىق دالەلدەمەلەردى ۇسىندى.
سوت ۇكىمىمەن ولاردىڭ ءارقايسىسىنا 6 جىلعا باس بوستاندىعىنان ايىرۋ جازاسى تاعايىندالىپ، كوممەرسيالىق جانە كوممەرسيالىق ەمەس ۇيىمداردا باسشىلىق قىزمەتتەردى اتقارۋ قۇقىعىنان 10 جىلعا ايىرۋ جازاسى قولدانىلدى، دەپ قوستى قاداعالاۋ ورگانى.
زارداپ شەككەندەردىڭ ازاماتتىق تالاپتارى تولىق كولەمدە قاناعاتتاندىرىلىپ، ايىپتالۋشىلاردان وندىرىلۋگە جاتادى.