استانادا كەنەسارى كوشەسىندەگى لەپنينا ەلەمەنتتەرى بار عيماراتتىڭ قاسبەتىن جوندەۋ قالا تۇرعىنىنىڭ نارازىلىعىن تۋدىردى. ول Threads الەۋمەتتىك جەلىسىندە جاريا تۇردە شاعىمداندى. جاريالانىم اۆتورىن ەرەكشە الاڭداتقانى – جۇمىستارعا ەلوردالىق ۋربانيستيكا ورتالىعىنىڭ قاتىسى بارلىعى، دەپ حابارلايدى infohub.kz سايتى.
«سىزدەردىڭ بۇعان قاتىسىپ جاتقاندارىڭىزعا سەنگىم كەلمەيدى! استانادا سىزدەر جاساعان قانشاما تاماشا جوبا بار، ال كەنەسارى ساۋلەتىنە وسىلاي قارايسىزدار ما؟ ونداعان جىلعا شىداعان، ءبىراق سىزدەردىڭ جاڭارتۋلارىڭىزعا شىدامايتىن لەپنيناعا ارماتۋرا سالۋ دەگەنىڭىز نە؟» – دەپ جازدى ايەل.
وسى وتىنىشكە جاۋاپ رەتىندە استانا ۋربانيستيكا ورتالىعى بارلىق ساۋلەتتىك بولشەكتەر مەن لەپنينا ەلەمەنتتەرى ساقتالاتىنىنا سەندىردى.
«ولار الدىن الا سكانەرلەنىپ، ءقازىر باستاپقى ورنەكتە تابيعي تاستان قايتا جاسالۋدا. بۇگىنگى تاڭدا بۇل ەلەمەنتتەر دايىندالۋ كەزەڭىندە تۇر. قاسبەتتەگى جۇمىستار ءالى جالعاسۋدا، سوندىقتان ءقازىر كورىپ وتىرعانىڭىز – تۇپكىلىكتى ناتيجە ەمەس»، – دەدى ۋربانيستيكا ورتالىعىندا.
ايەل عيمارات اۆتورى-ساۋلەتشىنىڭ ويىنداعىداي بولىپ قالۋى ءۇشىن ءتۇپنۇسقا لەپنينانى نەگە قالپىنا كەلتىرۋگە بولمايتىنىن سۇرادى.
«استانا جاعدايىندا سىلاق قاسبەت، وكىنىشكە قاراي، ۇزاققا شىدامايدى، ۋاقىت وتە جارىلىپ، قابىرشاقتانادى. سوندىقتان مۇندا تابيعي تاسپەن ۇزاققا ءتوزىمدى شەشىم قابىلداندى، بۇل رەتتە بارلىق ساۋلەت جانە ساندىك ەلەمەنتتەر ساقتالادى. سونىمەن قاتار، شاتىردى قوسا العاندا، بۇكىل ءۇي كەشەندى تۇردە جوندەلۋدە. جۇمىستاردىڭ اياقتالۋىن كۇتىپ، سودان كەيىن ناتيجەنى باعالايىق»، – دەپ جاۋاپ بەردى ورتالىق جاريالانىم اۆتورىنا.