استانا تۇرعىنى تولە بي مەن سىعاناق كوشەلەرىنىڭ قيىلىسىنداعى ۇزدىكسىز كەپتەلىسكە نارازىلىق ءبىلدىردى. ول كەپتەلىستىڭ تەك قاربالاس ۋاقىتتا عانا ەمەس، كۇندىز جانە دەمالىس كۇندەرى دە تۋىندايتىنىن ايتتى، دەپ حابارلايدى infohub.kz سايتى.
Threads الەۋمەتتىك جەلىسىندەگى astdev_yerzhan دەگەن پايدالانۋشى ءوز جازباسىندا استانالىق قيىلىستىڭ بىرىنەن ءوتۋ كەزىندەگى ايتارلىقتاي قيىندىقتارعا نازار اۋداردى. جازبا اۆتورى قالا بيلىگىن جول قوزعالىسىن ۇيىمداستىرۋدى تالداۋعا، تۇراقتى كەپتەلىستىڭ سەبەپتەرىن انىقتاۋعا جانە وسى ۋچاسكەنىڭ وتكىزۋ قابىلەتىن ارتتىرۋ شارالارىن قولدانۋعا شاقىردى.
NUR.KZ ءتىلشىسى استانا اكىمدىگىنىڭ ءباسپاسوز قىزمەتىنەن تۇسىنىكتەمە سۇرادى. وندا تولە بي مەن سىعاناق كوشەلەرىنىڭ قيىلىسىندا LRT قۇرىلىسى جۇرگىزىلىپ جاتقانىن ءتۇسىندىردى.
«سىعاناق كوشەسى — ەلوردانىڭ وڭ جانە سول جاعالاۋىن بايلانىستىراتىن، قالا تۇرعىندارى سۇرانىسقا يە نەگىزگى كولىك ارتەريالارىنىڭ ءبىرى. قۇرىلىس جۇمىستارىنا بايلانىستى جەكەلەگەن ۋچاسكەلەردە قوزعالىس جوبانى ىسكە اسىرۋدىڭ اعىمداعى كەزەڭدەرىنە ساي ۇيىمداستىرىلعان. جول قوزعالىسىن ۇيىمداستىرۋدىڭ وزگەرۋى ۋاقىتشا سيپاتتا جانە قۇرىلىس جۇمىستارىن ءقاۋىپسىز ءارى دايەكتى جۇرگىزۋدى قامتاماسىز ەتۋگە مۇمكىندىك بەرەدى. جۇمىستار قولدانىستاعى كولىك جاعدايىن جانە كوشە-جول جەلىسى بويىنشا قوزعالىستى قامتاماسىز ەتۋ قاجەتتىلىگىن ەسكەرە وتىرىپ، كەزەڭ-كەزەڭىمەن جۇرگىزىلۋدە»، — دەدى اكىمدىكتە.
تۇرعىندارعا قۇرىلىس كەزەڭدەرى اياقتالعان سايىن جول جەلىسىنىڭ وتكىزۋ قابىلەتىن قالپىنا كەلتىرۋ جانە ودان ءارى ارتتىرۋ ءۇشىن جاعداي جاسالاتىنىنا سەندىردى. LRT قۇرىلىسى زاماناۋي ءارى ءتيىمدى كولىك جۇيەسىن قالىپتاستىرۋعا، حالىقتىڭ ۇتقىرلىعىن ارتتىرۋعا جانە ەلوردا تۇرعىندارى مەن قوناقتارىنىڭ ءجۇرىپ-تۇرۋىنا قولايلى جاعداي جاساۋعا باعىتتالعانى اتاپ ءوتىلدى.