كوكشەتاۋ پوليسەيلەرى استانادا 59 جاستاعى قالا تۇرعىنىنان 10 ملن تەڭگەدەن استام اقشا العان كۋرەردى ءىزىن سۋىتپاي ۇستادى، دەپ حابارلايدى infohub.kz سايتى.
اقمولا وبلىسى پوليسيا دەپارتامەنتىنىڭ ءباسپاسوز قىزمەتى ءمالىم ەتكەندەي، 11 قىركۇيەكتە كوكشەتاۋ پوليسيا باسقارماسىنا ينتەرنەت-الاياقتىق تۋرالى ارىز تۇسكەن. ايەل بەلگىسىز ادامداردىڭ وزدەرىن قۇقىق قورعاۋ ورگاندارىنىڭ قىزمەتكەرلەرى رەتىندە تانىستىرىپ، ونى ءىرى كولەمدە اقشا بەرۋگە كوندىرگەنىن ايتقان.
قىلمىسكەرلەردىڭ نۇسقاۋىمەن زارداپ شەككەن ايەل 10 ملن تەڭگەدەن استام قاراجات جيناپ، كەلگەن كۋرەرگە پاكەتتى تاپسىرعان. ەر ادام اقشامەن كەتكەن سوڭ عانا ايەل الاياقتىقتىڭ قۇربانى بولعانىن ءتۇسىنىپ، دەرەۋ پوليسياعا جۇگىنگەن.
«ۋاقتىلى جۇگىنۋدىڭ ارقاسىندا پوليسەيلەر كۋرەردىڭ جەكە باسىن بىردەن انىقتادى. العاشقى جەدەل-ىزدەستىرۋ ءىس-شارالارى بارىسىندا ەر ادامنىڭ استانادا تۇراتىنى بەلگىلى بولدى. پوليسەيلەر دەرەۋ استاناعا اتتاندى. ءتورت ساعاتتان استام ۋاقىت بويى قىزمەتكەرلەر كۇدىكتىنى ىزدەستىردى. قابىلدانعان شارالاردىڭ ناتيجەسىندە ەر ادام انىقتالىپ، ۇستالدى. ونىڭ قاسىنان زارداپ شەككەن ايەلگە تيەسىلى اقشا تابىلىپ، تاركىلەندى. قۋانىشقا وراي، قىلمىسكەر الىنعان سومانىڭ بارلىعىن اۋدارىپ ۇلگەرمەگەن»، — دەدى اقمولا وبلىسى پد-دا.
ۇستالعان ەر ادام كوكشەتاۋعا بارىپ، اقشا سالىنعان پاكەتتى الۋ تۋرالى تەلەفون قوڭىراۋى كەلگەنىن ءتۇسىندىردى.
قازىرگى تاڭدا قاجەتتى تەرگەۋ جانە جەدەل ءىس-شارالار جۇرگىزىلۋدە. پوليسەيلەر ۇستالعان ادامنىڭ باسقا دا وسىعان ۇقساس قىلمىستارعا قاتىسى بولۋى مۇمكىندىگىن انىقتاپ جاتىر.