استانادا مەكتەپ فورماسىنىڭ تۇسىنە بايلانىستى داۋ تۋىندادى: №63 مەكتەپتىڭ وقۋشىسىنىڭ اناسى قارا شالبار كيگەنى ءۇشىن ايىپپۇل تولەۋ ءقاۋپى تۋرالى شاعىمداندى. ەلوردالىق ءبىلىم باسقارماسى مەكتەپتەردە قارا كيىمگە رۇقسات ەتىلگەنىن، ال ايىپپۇل تۋرالى اقپارات شىندىققا سايكەس كەلمەيتىنىن مالىمدەدى، دەپ حابارلايدى infohub.kz سايتى.
ايەلدىڭ ايتۋىنشا، ونىڭ بالاسى ساباققا قارا شالبار، اق كويلەك جانە قارا كەۋدەشە كيىپ كەلگەن. وسىدان كەيىن مەكتەپتەن وعان فورماعا قاتىستى تالاپ قويىپ قوڭىراۋ شالعان.
«فورماعا بايلانىستى جەتەكشى قوڭىراۋ شالىپ، تىكەلەي ايتادى: "كەلىڭىز، ايىپپۇل تولەيسىز". قارا شالبار ءۇشىن ايىپپۇل، كوك شالباردىڭ ورنىنا؟ شىنىمەن بە؟ شالباردىڭ ءتۇسى وقۋعا قالاي اسەر ەتەدى؟» — دەپ جازدى ول Threads-تە.
ايەل بۇل شالبارمەن وقۋشىنىڭ وتكەن وقۋ جىلىندا دا ساباققا بارعانىن، سول كەزدە كيىمگە ەشقانداي تالاپ بولماعانىن اتاپ ءوتتى.
«فورماعا تالاپتار بولسا، قاراپايىم ەسكەرتۋ جاساۋعا بولار ەدى. ءبىراق شالباردىڭ تۇسىنە بايلانىستى اتا-اناعا بىردەن ايىپپۇل تۋرالى ايتۋ — بۇل ارتىق. قانداي نەگىزدە ايىپپۇل تولەۋدى تالاپ ەتەدى؟» — دەپ اشۋلاندى انا.
استانا قالاسىنىڭ ءبىلىم باسقارماسى وتباسىنا ايىپپۇل ءقاۋپى ءتونىپ تۇرعانى تۋرالى اقپاراتتى جوققا شىعاردى. سونداي-اق ەلوردالىق مەكتەپ وقۋشىلارىنا كوك جانە قارا ءتۇستى فورما كيۋگە رۇقسات ەتىلگەنىن ناقتىلادى.
«اتالعان مەكتەپتىڭ وقۋشىلارىنىڭ اتا-انالارىنا مەكتەپ فورماسىنىڭ ءتۇسى ءۇشىن ايىپپۇل سالىنادى دەگەن اقپارات شىندىققا سايكەس كەلمەيدى»، — دەپ ءتۇسىندىردى ۆەدومستۆو.
شاعىمنان كەيىن №63 مەكتەپ اكىمشىلىگىنە پەداگوگتار مەن اتا-انالارمەن قوسىمشا ءتۇسىندىرۋ جۇمىستارىن جۇرگىزۋ تاپسىرىلدى. باسقارما سونداي-اق مەكتەپ فورماسىنا قويىلاتىن تالاپتاردى بۇرمالاۋعا جول بەرمەۋدى تالاپ ەتتى.
بۇعان دەيىن «كۋرسيۆ» ورال قالاسىنداعى وقۋشىلاردىڭ اتا-انالارىن بالالاردىڭ شاش ۇلگىسىنە قويىلاتىن تالاپتار جازىلعان جادىنامالار اشۋلاندىرعانىن جازعان بولاتىن.