استاناداعى تۇرعىن ءۇي كەشەندەرىنىڭ بىرىندە وتباسىلىق جانجال ەرلى-زايىپتىلاردىڭ ەكەۋىنىڭ دە ولىمىمەن اياقتالدى. كورشىلەردىڭ ايتۋىنشا، قايعىلى وقيعا الدىندا ايەل بىرنەشە رەت پودەزگە جۇگىرىپ شىعىپ، كومەك سۇراعان، دەپ حابارلايدى infohub.kz سايتى.
ەسكە سالايىق، ەلوردالىق تۇرعىن ءۇي كەشەندەرىنىڭ ءبىرىنىڭ توعىزىنشى قاباتىندا 55 جاستاعى ەر ادام مەن ونىڭ 53 جاستاعى جۇبايى قازا تاپقان. پوليسيا دەرەگىنشە، ەكەۋىنىڭ اراسىندا جانجال بولعان. ەر ادام ايەلگە پىشاق سالىپ، كەيىن وزىنە دە جاراقات تيگىزگەن. ەكەۋى دە دارىگەرلەر كەلگەنگە دەيىن كوز جۇمدى. بارلىعى ولاردىڭ كامەلەتكە تولماعان بالاسىنىڭ كوزىنشە بولعان.
«جەتىنشى ارنا» جۋرناليستەرى وقيعادان كەيىنگى كۇنى سول تۇرعىن ءۇي كەشەنىنە بارعان. پاتەرگە ىزدەۋ سالىنىپ، توڭىرەكتە قاندى ىزدەر قالعان. تەلەارنا مالىمەتىنشە، كىلەمدە اياقتىڭ قاندى ءىزى، قابىرعادا — قولدىڭ ءىزى بولۋى مۇمكىن داق كورىنگەن.
پاتەرلەردىڭ ءبىرىنىڭ يەلەرى بۇل جەرگە ءتورت جىل بۇرىن كوشىپ كەلگەندەرىن، قازا تاپقان جۇپتىڭ ول كەزدە دە وسىندا تۇرعانىن ايتتى. كورشى ايەل ەشقانداي جانجالدى بايقاماعانىن ەسكە الادى. ول بۇل قوناقتارى ءجيى كەلەتىن، ەسىگى ۇنەمى اشىق تۇراتىن قاراپايىم وتباسى دەپ ويلاعان. سوندىقتان بولعان وقيعا ونى قاتتى شوشىتقان.
«كەشكى ساعات 10:30 شاماسىندا ايقاي ەستىلدى، شامامەن ءۇش مينۋتتاي ايقاي ەستىپ، ول باسىلدى. ەكى رەت، مەنىڭ تۇسىنۋىمشە، ول پودەزگە جۇگىرىپ شىقتى، بالكىم قاشىپ كەتپەك بولدى ما، الدە قالاي، بىلمەيمىن. كەيىن جەدەل جاردەم كەلدى، ميليسيا كەلدى، سودان كەيىن بىردەڭە بولعانىن تۇسىندىك»، — دەيدى ول.
تۇرعىنداردىڭ ايتۋىنشا، سول قايعىلى ءتۇنى ايەل ايقايلاپ، كومەك سۇراعان، كەيىن ەر ادامنىڭ داۋىسى ەستىلگەن: «نە ىستەپ قويدىم مەن؟». سودان كەيىن تىنىشتىق ورناعان، دەيدى كورشىلەر.
ال سول پاتەردىڭ استىندا تۇراتىن تاعى ءبىر كورشىسى باقجامال كەشىرباەۆانىڭ ايتۋىنشا، ەرلى-زايىپتىلاردىڭ ايقايى مەن جانجالى تەك سول ءتۇنى عانا ەستىلمەگەن.
«بۇل ۇيدە جانجالدار بولىپ تۇردى. وتكەن جىلى ءجيى ەستيتىنبىز. ءبىز ۇيك وكىلىمەن بىرگە ولارعا بارىپ، ەسكەرتۋ جاسادىق. „سەندەر ەرەسەك ادامسىڭدار عوي، وسىنى قويىڭدار“ دەدىك. ول ىشىمدىك ىشەتىن بولىپ شىقتى. سوندا ءۇي يەسى پوليسيا شاقىرىپ، ول ەكى كۇنگە قامالدى. ول قايتىپ كەلگەن سوڭ، قايتادان جانجال شىعارعان بولۋى كەرەك»، — دەيدى كورشىسى باقجامال كەشىرباەۆا.
پوليسيا ءقازىر تەرگەۋ ءجۇرىپ جاتقانىن، ول وتباسىلىق درامانىڭ بارلىق سەبەپتەرى مەن ءمان-جايىن انىقتايتىنىن حابارلادى.
«جانجال بارىسىندا ەر ادام جۇبايىنا پىشاق سالىپ، كەيىن وزىنە دە پىشاق سالعانى انىقتالدى. العان جاراقاتتارىنان ەكەۋى دە وقيعا ورنىندا قازا تاپتى»، — دەپ ەسكە سالدى استانا قالالىق پد اقپاراتتىق ساياسات ءبولىمىنىڭ باسشىسى ەلميرا شاۋلەنوۆا.
ايتا كەتەيىك، جۇپتىڭ بەس بالاسى قالدى، تورتەۋى ەرەسەك، كامەلەتكە تولعان. ال كىشى ۇلى 14 جاستا، ول دا قايعىلى ءتۇنى پاتەردە بولعان. ءقازىر ونىمەن پسيحولوگتار جۇمىس ىستەپ جاتىر، بالا اعا-اپكەلەرىنىڭ قولىندا.