استانانىڭ ەكى تۇرعىنى تۇنگى ۋاقىتتا تۇرعىن ءۇي اۋلالارىندا ساليۋت اتىپ، بەس تاۋلىككە قامالدى. جىگىتتەر دوستارىن تۋعان كۇنىمەن قۇتتىقتاعىسى كەلگەن، الايدا قالا تۇرعىندارىنىڭ تىنىشتىعىن بۇزعان، دەپ حابارلايدى infohub.kz.
العاشقى وقيعا سارىارقا اۋدانىندا بولدى. ەلوردانىڭ 18 جاستاعى تۇرعىنى ىقىلاس دۇكەن ۇلى كوشەسىندەگى ءۇيدىڭ اۋلاسىندا ساليۋت اتقان. قاتتى دىبىس جەرگىلىكتى تۇرعىنداردى وياتىپ، ولار پوليسياعا حابارلاسقان.
ۇقساس جاعداي ەسىل اۋدانىندا تىركەلدى. وندا 24 جاستاعى ەر ادام ءال-فارابي داڭعىلىنداعى تۇرعىن ءۇيدىڭ جانىندا تۇنگى ساليۋت ۇيىمداستىرعان. ول دا دوسىن قۇتتىقتاعىسى كەلگەنىن ايتقان.
ەكەۋى دە ۇساق بۇزاقىلىق ءۇشىن اكىمشىلىك جاۋاپكەرشىلىككە تارتىلدى. سوت ولاردىڭ ءارقايسىسىنا بەس تاۋلىك قاماۋ جازاسىن تاعايىندادى.
«تۇرعىن ءۇي اۋلالارىندا تۇنگى ۋاقىتتا پيروتەحنيكالىق بۇيىمداردى قولدانۋ كوپتەگەن ازاماتتاردىڭ مۇددەسىنە نۇقسان كەلتىرەدى. پوليسيا مۇنداي فاكتىلەرگە دەرەۋ جاۋاپ بەرىپ، بۇزۋشىلاردى انىقتايدى جانە زاڭدا كوزدەلگەن شارالاردى قولدانادى»، — دەدى استانا قالالىق پد قوعامدىق قاۋىپسىزدىك باسقارماسىنىڭ باستىعى مارات ومىربايەۆ.
پوليسيا تۋعان كۇندى تويلاۋ قوعامدىق ءتارتىپتى ساقتاۋ مىندەتىنەن بوساتپايتىنىن ەسكە سالدى. اۋلالاردا كەش ۋاقىتتا پيروتەحنيكانى اتۋ زاڭ بۇزۋشىلىق بولىپ سانالادى جانە جاۋاپكەرشىلىككە اكەپ سوعادى.