استانادا مەيرامحانادا توي وتكىزگەن ەر ادام پيروتەحنيكانى قولدانعانى ءۇشىن جاۋاپكەرشىلىككە تارتىلدى، دەپ حابارلايدى infohub.kz سايتى.
استانا قالالىق پوليسيا دەپارتامەنتىنىڭ مالىمەتىنشە، «قىز ۇزاتۋ» ءراسىمى اياقتالعان سوڭ، 27 جاستاعى ەلوردا تۇرعىنى مەيرامحانالاردىڭ ءبىرىنىڭ جانىندا فەيەرۆەرك اتقان. قاتتى دىبىس ماڭايداعى تۇرعىن ءۇي كەشەندەرىنىڭ تۇرعىندارىنىڭ تىنىشتىعىن بۇزىپ، ازاماتتاردىڭ نارازىلىعىن تۋدىرعان. ەر ادامعا قاتىستى ۇساق بۇزاقىلىق بويىنشا اكىمشىلىك حاتتاما تولتىرىلعان.
سوت قۇقىق بۇزۋشىعا بەس تاۋلىككە اكىمشىلىك قاماۋعا الۋ جازاسىن تاعايىندادى.
پوليسيادا مەرەكەلىك كوڭىل-كۇي اينالاداعىلاردىڭ تىنىشتىعىن بۇزۋعا سەبەپ بولماۋى كەرەكتىگىن اتاپ ءوتتى. «توي وتكىزۋ، پيروتەحنيكانى قولدانۋ جانە وزگە دە ارەكەتتەر زاڭناما مەن قوعامدىق ءتارتىپ تالاپتارىن ساقتاي وتىرىپ جۇزەگە اسىرىلۋى ءتيىس. اينالاداعىلارعا اشىق قۇرمەتسىزدىك بىلدىرەتىن جانە قوعامدىق ءتارتىپتى بۇزاتىن ارەكەتتەر ءۇشىن زاڭدا بەلگىلەنگەن اكىمشىلىك جاۋاپكەرشىلىك قاراستىرىلعان»، — دەپ قوستى دپ وكىلدەرى.