استانانىڭ بايقوڭىر اۋدانىندا تاراز كوشەسىندە رۇقسات قۇجاتتارىنسىز، مۇنداي نىسانعا ارنالماعان ۋچاسكەدە سالىنعان وزىنە-وزى قىزمەت كورسەتەتىن كولىك جۋۋ ورنىن بۇزۋ باستالدى، دەپ حابارلايدى infohub.kz سايتى.
استانا اكىمدىگىنىڭ مالىمەتىنشە، نىسان تۇرعىن ۇيلەرگە تىم جاقىن ورنالاسىپ، جەرگىلىكتى تۇرعىندارعا قولايسىزدىق تۋعىزعان. بۇعان دەيىن ەلوردالىق مەملەكەتتىك ساۋلەت-قۇرىلىس باقىلاۋىنىڭ ينسپەكتورلارى زاڭسىز قۇرىلىس يەسىنە بۇزۋشىلىقتاردى جويۋ قاجەتتىگىن ەسكەرتكەن، الايدا ول بۇل تالاپتاردى ەلەمەگەن.
«مسقب باسقارماسى بۇل نىسان بويىنشا جوسپاردان تىس تەكسەرۋ جۇرگىزدى. تەكسەرۋ قورىتىندىسى بويىنشا مەنشىك يەسىنە قاتىستى اكىمشىلىك شارالار قولدانىلىپ، انىقتالعان بۇزۋشىلىقتاردى جويۋ تۋرالى نۇسقاما بەرىلدى. نۇسقاما ورىندالماعاندىقتان، باسقارما نىساندى بۇزۋ تۋرالى سوت تالابىن قوزعادى»، — دەپ ءتۇسىندىردى استانا مەملەكەتتىك ساۋلەت-قۇرىلىس باقىلاۋى باسقارماسىنىڭ باس مامانى ءومىرجان كەرەيحان.
تالاس-تارتىس سەگىز ايعا سوزىلىپ، نىساندى بۇزۋ تۋرالى سوت شەشىمىمەن اياقتالدى.
ايتا كەتەيىك، بۇگىنگى تاڭدا باسقارما 341 جوسپاردان تىس تەكسەرۋ جۇرگىزىپ، بۇزۋشىلىقتاردى جويۋ تۋرالى 182 نۇسقاما بەردى، جالپى سوماسى 265 ملن تەڭگەدەن اساتىن 702 اكىمشىلىك ايىپپۇل سالدى.
«قالا تۇرعىندارىن ساۋلەت، قالا قۇرىلىسى جانە قۇرىلىس قىزمەتى سالاسىنداعى زاڭ تالاپتارىن ساقتاۋعا شاقىرامىز. سونداي-اق اتالعان زاڭدى ساقتاماۋ اكىمشىلىك جاۋاپكەرشىلىككە اكەپ سوعاتىنىن ەسكە سالامىز»، — دەدى اكىمدىكتە.