استانا – تەمىرتاۋ تاسجولىندا جۇرگىزۋشىلەردىڭ زەيىنىنىڭ تومەندەۋى سالدارىنان جول-كولىك وقيعالارى ورىن الدى. اپاتتار جاساندى ينتەللەكتىسى بار كامەرالارعا تىركەلگەن، دەپ حابارلايدى infohub.kz سايتى.
«قازاۆتوجول» ۇلتتىق كومپانياسىنىڭ رەسمي Telegram-ارناسىندا حابارلانعانداي، اتالعان تاسجولدا جاساندى ينتەللەكت ەلەمەنتتەرى بار كامەرالار بىرنەشە سوقتىعىسۋدى تىركەگەن. «بەينەجازبالارعا قاراعاندا، جۇرگىزۋشىلەر جول جاعدايىنا ۋاقىتىندا ارەكەت ەتپەگەن جانە الداعى كولىكتەرمەن تەجەۋسىز دەرلىك سوقتىعىسقان. زەيىننىڭ تومەندەۋىنە ۇيقىشىلدىق، شارشاۋ نەمەسە سمارتفونعا الاڭداۋ سەبەپ بولۋى مۇمكىن. اپاتتىڭ ناقتى ءمان-جايى قۇزىرەتتى ورگاندار تاراپىنان انىقتالۋدا. تىركەلگەن اپاتتار سالدارىنان قازا تاپقاندار جوق»، — دەلىنگەن «قازاۆتوجول» حابارلاماسىندا.
كومپانيادا بۇل كادرلار بىرنەشە سەكۋندتىق زەيىنسىزدىكتىڭ قانشالىقتى ءقاۋىپتى بولۋى مۇمكىن ەكەنىن كورسەتەتىنىن اتاپ ءوتتى. جوعارى جىلدامدىقتا كولىك وسى ۋاقىت ىشىندە ونداعان مەتر جول جۇرەدى، ال جۇرگىزۋشىنىڭ سوقتىعىسۋدان قۇتىلۋ مۇمكىندىگى ءىس جۇزىندە بولمايدى.
ۇلتتىق كومپانيا جۇرگىزۋشىلەردى ءجۇرىس كەزىندە سمارتفوندى پايدالانباۋعا جانە ۇيقىشىلدىق پايدا بولعاندا جولدى جالعاستىرماۋعا شاقىردى. «شارشاعانىڭىزدى سەزسەڭىز — ءقاۋىپسىز جەرگە توقتاپ، دەمالىڭىز»، — دەپ كەڭەس بەرەدى «قازاۆتوجولدا».