وقۋ جىلىنىڭ باستالۋىمەن استانا جۇرگىزۋشىلەرى بالالار مەن باسقا دا جول قوزعالىسىنا قاتىسۋشىلارعا ءقاۋىپ توندىرمەۋ ءۇشىن توقتاۋ جانە تۇراققا قويۋ ورىندارىن مۇقيات تاڭداۋعا شاقىرىلدى، دەپ حابارلايدى infohub.kz سايتى.
جول قوزعالىسىن ۇيىمداستىرۋ ورتالىعى اۆتوكولىك جۇرگىزۋشىلەرىنە، اسىرەسە وقۋ ورىندارىنىڭ جانىندا، توقتاۋ جانە تۇراق قويۋ ەرەجەلەرىن ساقتاۋ قاجەتتىگىن ەسكە سالدى.
"توقتاۋ جانە تۇراق قويۋ ەرەجەلەرىن بۇزۋ جول قوزعالىسى مەن جاياۋ جۇرگىنشىلەردىڭ قاۋىپسىزدىگىنە تىكەلەي ءقاۋىپ توندىرەدى. بەلگىلەنبەگەن جەرلەردە قالدىرىلعان كولىكتەر جاياۋ جۇرگىنشىلەر وتكەلدەرىندە كورىنۋدى جاۋىپ، ادامداردى جولدىڭ ءجۇرۋ بولىگىنە شىعۋعا ءماجبۇر ەتەدى جانە باسقا قاتىسۋشىلاردىڭ قوزعالىسىن قيىنداتادى. سونىمەن قاتار، مۇنداي كولىكتەر جەدەل قىزمەتتەردىڭ – جەدەل جاردەم، ءورت سوندىرۋشىلەر مەن پوليسيانىڭ – وتۋىنە كەدەرگى كەلتىرەدى، ولاردىڭ جىلدامدىعىنان كوبىنەسە ادام ءومىرى تاۋەلدى"، – دەپ اتاپ ءوتتى ورتالىقتا.
مەكتەپتەر مەن بالاباقشالاردىڭ جانىندا جاياۋ جۇرگىنشى بالالار كوبەيەدى. سوندىقتان وقۋ ورىندارىنا ءقاۋىپسىز جاقىنداۋ جولدارى مەن وتكەلدەردەگى جاقسى كورىنۋ ەرەكشە ماڭىزدى.
جول قوزعالىسىن ۇيىمداستىرۋ ورتالىعى اۆتوكولىك جۇرگىزۋشىلەرىن جول قوزعالىسى ەرەجەلەرىن ساقتاۋعا، تىيىم سالاتىن بەلگىلەر ايماعىندا جانە جاياۋ جۇرگىنشىلەر وتكەلدەرىندە تۇراققا قويماۋعا شاقىردى. سونداي-اق جۇرگىزۋشىلەرگە كولىكتەرىن تەك رۇقسات ەتىلگەن جەرلەردە قالدىرۋ كەرەكتىگى ەسكەرتىلدى.