استانا تۇرعىنى شاحماتتان سپورت رازريادىن الۋعا ۇمىتتەنىپ، الاياقتىڭ قۇربانى بولىپ، 1،8 ملن تەڭگە جوعالتتى... دەپ حابارلايدى infohub.kz.
ىشكى ىستەر مينيسترلىگىنىڭ حابارلاۋىنشا، كۇدىكتى ورتاق تانىسى ارقىلى جابىرلەنۋشىنىڭ سەنىمىنە كىرىپ، سپورت رازريادىن رەسىمدەۋگە كومەكتەسەتىنىن ايتقان. قىزمەتى ءۇشىن ول 1،5 ملن تەڭگە تالاپ ەتكەن. اقشانى العاننان كەيىن الاياق ماسەلەنىڭ شەشىلىپ جاتقانىن ايتىپ، كەيىن ءارتۇرلى سىلتاۋلارمەن تاعى 300 مىڭ تەڭگەنى الداپ العان. بارلىق سومانى العان سوڭ، ول ۇزاق ۋاقىت بويى جابىرلەنۋشىنى الداپ، ءىستى رەتتەيتىنىن ۋادە ەتىپ، كەيىن بايلانىسقا شىقپاي قويعان.
پوليسيا قىزمەتكەرلەرى كۇدىكتىنىڭ جەكە باسىن انىقتاپ، ونى باسقا قالادا ۇستاپ، استاناعا جەتكىزگەن. قازىرگى ۋاقىتتا سوتقا دەيىنگى تەرگەۋ جۇرگىزىلىپ، وقيعانىڭ بارلىق ءمان-جايى انىقتالۋدا.
«استانا قالاسى پوليسيا دەپارتامەنتى ازاماتتاردى ساق بولۋعا جانە جەكە بايلانىستارى ارقىلى ماسەلەلەردى شەشۋگە نەمەسە بەلگىلى ءبىر قىزمەتتەر مەن قۇجاتتاردى الۋعا كەپىلدىك بەرەتىن ادامدارعا اقشا اۋدارماۋعا شاقىرادى»، — دەدى ءتارتىپ ساقشىلارى.