اتىراۋدىڭ بۇرىنعى اكىمى شاكير كەيكين ءۇش جىلدان استام باسقارعان قالا باسشىسى قىزمەتىنەن كەتكەن سوڭ تۇرعىندارعا ۇندەۋ جاسادى. ول ءتيىستى جازبانى Instagram پاراقشاسىندا جاريالادى، دەپ حابارلايدى infohub.kz سايتى.
«2023 جىلدىڭ شىلدەسىنەن بۇگىنگە دەيىن اتىراۋدىڭ باسشىسى بولىپ، تۋعان قالامىزدىڭ دامۋىنا ءوز ۇلەسىمدى قوسۋ مۇمكىندىگىنە يە بولعانىمدى ۇلكەن جاۋاپكەرشىلىك ءارى قۇرمەت دەپ سانايمىن»، — دەدى شاكير كەيكين.
ول وسى ۋاقىت ىشىندە ينفراقۇرىلىمدى دامىتۋ، جولداردى جوندەۋ، اباتتاندىرۋ، كوگالداندىرۋ، الەۋمەتتىك نىسانداردىڭ جاعدايىن جاقسارتۋ جۇمىستارى اتقارىلعانىن قوستى. «قالانىڭ دامۋى — ءبىر ادامنىڭ عانا ەمەس، بارلىق تۇرعىننىڭ ەڭبەگىنىڭ ناتيجەسى»، — دەپ جازدى ەكس-اكىم.
ونىڭ ايتۋىنشا، بۇل جىلدارى قالا تۇرعىندارىمەن جۇزدەگەن كەزدەسۋ وتكىزىلىپ، ولاردىڭ ۇسىنىستارى مەن تىلەكتەرى تىڭدالدى، ەشبىر ماسەلە نازاردان تىس قالمادى.
«وبلىس باسشىلىعىنا، ارىپتەستەرىمە، قالانىڭ بارلىق مەكەمەلەرى مەن ۇيىمدارىنىڭ قىزمەتكەرلەرىنە، ەڭبەك ادامدارىنا، قوعامدىق ۇيىمدار مەن بەلسەندىلەرگە، ەڭ باستىسى، ماعان كورسەتكەن سەنىمدەرى مەن قولداۋلارى ءۇشىن اتىراۋدىڭ ءاربىر تۇرعىنىنا العىس بىلدىرەمىن»، — دەدى بۇرىنعى قالا باسشىسى.
ول اكىم قىزمەتىندەگى جىلدار ءوزى ءۇشىن ۇلكەن مەكتەپ بولعانىن اتاپ ءوتىپ، بارشاعا زور دەنساۋلىق پەن وتباسىلىق بەرەكە تىلەدى. «ال سۇيىكتى اتىراۋ قالاسىنا — تۇراقتى دامۋ مەن ودان ءارى تابىس تىلەيمىن»، — دەپ قورىتىندىلادى شاكير كەيكين.
ەسكە سالايىق، ول اتىراۋ اكىمى قىزمەتىن 2023 جىلدىڭ شىلدەسىنەن باستاپ اتقارعان. بۇگىن ونىڭ قىزمەتتەن كەتكەنى بەلگىلى بولدى. بيىلعى ماۋسىمدا اتىراۋ اكىمىنىڭ ورىنباسارى مەيىرجان مۇقاسوۆتىڭ ۇستالعانى تۋرالى اقپارات تاراعان. ۇقك تەرگەۋگە دەيىنگى تەرگەپ-تەكسەرۋ جۇرگىزىلىپ جاتقانىن مالىمدەدى.
سونداي-اق الەۋمەتتىك جەلىلەردە قالا اكىمىنىڭ م.ا. تيلەك ماحۋوۆتىڭ ۇستالعانى تۋرالى اقپارات تارادى. ۇقك دە تەرگەۋگە دەيىنگى تەرگەپ-تەكسەرۋ جۇرگىزىلىپ جاتقانىن مالىمدەدى.
ۇستاۋلار تۋرالى جاڭالىقتاردان كەيىن اتىراۋ تۇرعىندارى قالا اكىمى شاكير كەيكيننىڭ قايدا ەكەنىن جانە نەگە كوپشىلىك الدىنا شىعۋىن توقتاتقانىن سۇراي باستادى. اتىراۋ اكىمدىگى ونىڭ ەڭبەك دەمالىسىندا بولعانىن، ءبىراق جۇمىسقا شىعىپ، ءوز مىندەتتەرىن اتقارىپ جاتقانىن جاۋاپ بەردى.