اتىراۋدا تۇرعىندار شاعىمدانعان ساسىق ءيىس پەن لاس اۋانىڭ سەبەپتەرى ءالى دە انىقتالىپ جاتىر. قىركۇيەك ايىنىڭ باسىندا جەكەلەگەن مونيتورينگ بەكەتتەرىندە كۇكىرتسۋتەكتىڭ جوعارى كونسەنتراسياسى تىركەلدى. ەكولوگيا مينيسترلىگى لاستانۋدىڭ نەگىزگى كوزدەرىن اتاپ، جوسپاردان تىس تەكسەرۋ تۋرالى حابارلادى، دەپ جازادى infohub.kz سايتى.
قالادا كۇكىرتسۋتەك بويىنشا شەكتەن اسۋ دەرەكتەرى تىركەلۋدە. مينيسترلىكتەگىلەر قالاداعى كۇكىرتسۋتەكتىڭ كونسەنتراسياسى ءالسىز جەلدە جانە تۇندە، لاستاۋشى زاتتار ناشار تاراعان كەزدە ارتاتىنىن ءتۇسىندىردى.
لاستانۋدىڭ نەگىزگى كوزدەرى رەتىندە اتىراۋ مۇناي وڭدەۋ زاۋىتى، «اتىراۋ وبلىسى سۋ ارناسى» كمك-نىڭ كارىز نىساندارى، «كۆادرات» بۋلاندىرۋ الاڭى، جىلىتۋ قازاندىقتارى مەن جەو اتالدى.
8 قىركۇيەكتە اتىراۋ وبلىسى بويىنشا ەكولوگيا دەپارتامەنتى اتموسفەرالىق اۋانىڭ ساپاسىنا جوسپاردان تىس تەكسەرۋ باستادى.
ءىرى كاسىپورىنداردا اۆتوماتتاندىرىلعان مونيتورينگ جۇيەلەرى ورناتىلعان. ولار شىعارىندىلار تۋرالى دەرەكتەردى قورشاعان ورتا مەن تابيعي رەسۋرستاردىڭ جاعدايى تۋرالى ۇلتتىق دەرەكتەر بانكىنە جىبەرەدى.
«ۇزدىك قولجەتىمدى تەحنيكالاردى، كاسىپورىندارداعى اۆتوماتتاندىرىلعان مونيتورينگ جۇيەسىن ەنگىزۋ، قولدانىستاعى زاڭناما تالاپتارىن ساقتاۋ اتموسفەرالىق اۋانىڭ لاستانۋ دەڭگەيىن تومەندەتۋگە مۇمكىندىك بەرەدى»، — دەلىنگەن ەكولوگيا مينيسترلىگىنىڭ حابارلاماسىندا.
ۆەدومستۆو سونداي-اق شىعارىندىلاردى قىسقارتۋ جانە جۇيەلەردى جاڭعىرتۋ جونىندەگى شارالار تۋرالى مالىمدەدى.
بۇعان دەيىن اتىراۋ وبلىسىنىڭ اكىمى بولات اقشولاقوۆ شۇعىل اپپاراتتىق جينالىس وتكىزىپ، مۇناي استاناسىنداعى ەكولوگيالىق احۋالدىڭ سىن شەگىنە جەتكەنىن رەسمي تۇردە مويىندادى. ءوڭىر باسشىسى زاۋىتتاردى تەكسەرۋدى تاپسىردى.
بۇرىن «كۋرسيۆ» اتىراۋ مۇناي وڭدەۋ زاۋىتى قاڭتارداعى شىعارىندىلارى ءۇشىن 520 ملن تەڭگە ايىپپۇل سالىنعانىن جازعان بولاتىن.