اتىراۋدا مۇرىنداعى ءپوليپتى جوسپارلى تۇردە الۋ وپەراسياسى قايعىلى جاعدايمەن اياقتالدى: 16 جاستاعى وقۋشى قىز كوز جۇمدى. وتا جاسالعان سوڭ قىزدىڭ جاعدايى كۇرت ناشارلاپ، شامامەن ءبىر ساعاتتان كەيىن ول رەانيماسيا بولىمشەسىنە اۋىستىرىلدى، دەپ حابارلايدى infohub.kz سايتى.

«اق جايىق» باسىلىمىنىڭ دەرەگىنشە، وقۋشى قىز اتىراۋ وبلىستىق بالالار اۋرۋحاناسىنا مۇرىنداعى ءپوليپتى الۋ ءۇشىن جوسپارلى وتاعا تۇسكەن. الەۋمەتتىك جەلىلەردە تاراعان بەينەجازبادا وتا جاساعان حيرۋرگ قىزدىڭ مۇرنىنا ادەتتە ءبىر تاۋلىككە قالدىرىلاتىن تامپون قويىلعانىن ايتقان.

سول جازباداعى انەستەزيولوگ دارىگەر تامپوننىڭ بار ەكەنىن بىلمەگەنىن مالىمدەدى. ونىڭ ايتۋىنشا، ءبىر ساتتە ناۋقاس ءوز بەتىمەن تىنىس الۋدى توقتاتقان.

«تامپوننىڭ جىلجىعانىن بايقامادىم. ول تىنىس الۋدى توقتاتتى. تەكسەرىپ كورگەندە وڭ جاعىنان تىنىس جوق ەكەنى انىقتالدى. كەيىن ونى رەنتگەن ارقىلى انىقتادىق»، — دەيدى دارىگەر.

مەديكتەردىڭ اڭگىمەسىنەن وتادان كەيىنگى كەزەڭدە تامپوننىڭ ورنالاسۋىنا جانە تىنىس الۋدىڭ بۇزىلۋىنا بايلانىستى ماسەلە تۋىنداعانى بايقالادى. رەانيماتولوگ دارىگەر تامپوننىڭ ۋاقىتىندا الىنعانىن حابارلادى. ودان كەيىن قىز تاعى 18 كۇن رەانيماسيادا جاتىپ، قارقىندى ەم قابىلدادى. ەمگە قاراماستان، ونىڭ جاعدايى ودان ءارى ناشارلاي بەردى. سونىڭ سالدارىنان ول كوز جۇمدى.

وقۋشى قىزدىڭ اتا-اناسى قايعىلى جاعداي مەديسينا قىزمەتكەرلەرىنىڭ ارەكەتىنەن بولۋى مۇمكىن دەپ ەسەپتەپ، وتادان كەيىنگى العاشقى ساعاتتاردا ناقتى نە بولعانىن، بالاعا كومەكتىڭ قانشالىقتى ۋاقىتىندا كورسەتىلگەنىن جانە تۋىنداعان اسقىنۋ كەيىنگى قايتىمسىز سالدارعا اكەلۋى مۇمكىن بولعانىن انىقتاۋدى تالاپ ەتىپ وتىر.

اتىراۋ وبلىسىنىڭ دەنساۋلىق ساقتاۋ باسقارماسى مارقۇمنىڭ تۋعان-تۋىستارىنا كوڭىل ايتىپ، بولعان جاعداي بويىنشا ارنايى كوميسسيا قۇرىلىپ جاتقانىن حابارلادى.

«اتالعان وتا تەحنيكالىق تۇرعىدان كۇردەلى ءارى جوعارى دالدىكتى قاجەت ەتەتىن حيرۋرگيالىق ارالاسۋلارعا جاتادى. مۇنداي وتالاردى جاساۋ كەزىندە، سونداي-اق وتادان كەيىنگى كەزەڭدە مەديسينالىق تاجىريبەدە بەلگىلى كەيبىر تاۋەكەلدەر مەن اسقىنۋلاردىڭ تۋىنداۋ ىقتيمالدىعىن تولىق جوققا شىعارۋ مۇمكىن ەمەس. وتادان كەيىن ناۋقاستىڭ جاعدايى كۇرت ناشارلاۋىنا بايلانىستى مەديسينالىق ۇيىم شۇعىل جانە قارقىندى ەمدەۋ شارالارىن تولىق كولەمدە جۇرگىزدى. سونىمەن قاتار ءتيىستى بەيىندى ماماندار مەن رەسپۋبليكالىق دەڭگەيدەگى ساراپشىلاردىڭ كونسۋلتاسيالارى ۇيىمداستىرىلدى»، — دەپ ءتۇسىندىردى ۆەدومستۆونىڭ ءباسپاسوز قىزمەتى.

باسقارمانىڭ مالىمەتىنشە، كوميسسيا بولعان جاعدايدىڭ ءمان-جايىن، كورسەتىلگەن مەديسينالىق كومەكتىڭ ۋاقىتىلى ءارى ساپالى بولعانىن، سونداي-اق وتادان كەيىن تۋىنداعان اسقىنۋلاردىڭ سەبەپتەرىن زەردەلەۋى ءتيىس. وبەكتيۆتى قورىتىندى دايىنداۋ ءۇشىن مەديسينالىق قۇجاتتامانى تاۋەلسىز بەيىندى مامانداردىڭ قاتىسۋىمەن زەرتتەۋ جوسپارلانىپ وتىر.

«تەكسەرۋ مەن ساراپتاما شارالارى تولىق اياقتالعانشا قانداي دا ءبىر الدىن الا تۇجىرىم جاساۋعا نەگىز جوق. ناۋقاس تۋرالى ەگجەي-تەگجەيلى مەديسينالىق اقپارات دارىگەرلىك قۇپيانى ساقتاۋ جانە دەربەس دەرەكتەردى قورعاۋ تالاپتارىنا سايكەس جاريا ەتىلمەيدى»، — دەدى ۆەدومستۆودا.

وقۋشى قىز بيىل 11-سىنىپقا بارۋى ءتيىس ەدى. ول وتباسىنداعى ۇلكەن بالا بولاتىن.