قازاقستان دەنساۋلىق ساقتاۋ مينيسترلىگى سوڭعى جىلدارى اۋىلدىق مەديسينانىڭ دامۋ قورىتىندىسىن شىعاردى، دەپ حابارلايدى infohub.kz سايتى.
2019 جىلدان باستاپ رەسپۋبليكادا دەنساۋلىق ساقتاۋدىڭ 1263 نىسانى سالىندى. ولاردىڭ ىشىندەگى ەڭ ىرىلەرى — استاناداعى ۇلتتىق عىلىمي ونكولوگيالىق ورتالىق جانە 200 توسەكتىك ۇلتتىق ۇيلەستىرۋ شۇعىل مەديسينا ورتالىعى، سونداي-اق الماتىداعى 350 توسەكتىك ۇلتتىق عىلىمي جۇقپالى اۋرۋلار ورتالىعى.
قازىرگى ۋاقىتتا ەلىمىزدە جالپى قۇنى 108 ملرد تەڭگەنى قۇرايتىن تاعى 51 مەديسينالىق نىسان سالىنىپ جاتىر. ولاردىڭ قاتارىندا — قىزىلوردا مەن وسكەمەندەگى 300 توسەكتىك كوپبەيىندى اۋرۋحانالار، سونداي-اق اتىراۋ جانە سولتۇستىك قازاقستان وبلىستارى مەن تالدىقورعانداعى جاڭا ەمحانالار.
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا 2025 جىلدىڭ سوڭىنا قاراي العاشقى مەديسينالىق-سانيتارلىق كومەكتىڭ جوسپارلانعان 655 نىسانىنىڭ قۇرىلىسى اياقتالدى: 253 مەدپۋنكت، 160 دارىگەرلىك امبۋلاتوريا جانە 242 فەلدشەرلىك-اكۋشەرلىك پۋنكت.
سونىمەن قاتار 32 اۋداندىق اۋرۋحانا جاڭعىرتىلۋدا، ونىڭ 12ء-سى تولىق جاڭارتىلدى. دەنساۋلىق ساقتاۋ مينيسترلىگىنىڭ باعالاۋىنشا، جاڭعىرتۋ اياقتالعاننان كەيىن 4 ميلليوننان استام اۋىل تۇرعىنى ۇيىنە جاقىن جەردە زاماناۋي مەديسينالىق كومەك الا الادى.
اۋرۋحانالارعا كومپيۋتەرلىك توموگرافتار مەن انگيوگرافيالىق كەشەندەردى قوسا العاندا، زاماناۋي جابدىقتار ورناتىلۋدا. بۇل ينفاركت جانە ينسۋلتپەن اۋىراتىن ناۋقاستاردى وبلىستىق اۋرۋحانالارعا جىبەرمەي، تىكەلەي اۋداندىق ورتالىقتاردا ەمدەۋگە مۇمكىندىك بەرەدى.
عيماراتتار مەن جابدىقتاردى جاڭارتۋمەن قاتار كادر ماسەلەسى دە شەشىلۋدە. 2023–2025 جىلدارى جانە 2026 جىلدىڭ ءبىرىنشى جارتىجىلدىعىندا اۋىلدىق مەديسينالىق ۇيىمدارعا 722 دارىگەر جانە 1013 ورتا مەديسينالىق قىزمەتكەر جۇمىسقا ورنالاستى.
تاعى 624 دارىگەر مەن 642 ورتا بۋىن مامانى ءقازىر جاڭعىرتىلىپ جاتقان اۋداندىق اۋرۋحانالارعا جۇمىسقا كەلدى. دەنساۋلىق ساقتاۋ مينيسترلىگى اۋىلدىق دەنساۋلىق ساقتاۋدى كادرلارمەن قامتاماسىز ەتۋ جوسپارى 100% ورىندالعانىن مالىمدەيدى.
بۇعان دەيىن «كۋرسيۆ» قازاقستاندا قايتارىلعان اكتيۆتەر ەسەبىنەن دەنساۋلىق ساقتاۋدى جاڭعىرتۋعا 176،8 ملرد تەڭگەگە 191 جوبا ماقۇلدانعانىن حابارلاعان.