قازاقستان حالىقارالىق باعىتتا العاش رەت ايەلدەر ۆاگونىن ىسكە قوسادى: ونى وزبەكستان استاناسىنا باراتىن پويىز جولاۋشىلارى پايدالانا الادى، دەپ حابارلايدى infohub.kz سايتى.
«جولاۋشىلار تاسىمالى» اق مالىمەتىنشە، №1/2 «الماتى — تاشكەنت» حالىقارالىق پويىزىنىڭ قۇرامىنداعى ايەلدەر ۆاگونى 1 قازاننان باستاپ جۇرە باستايدى.
«وسى باعىتتاعى سۇرانىس پەن جولاۋشىلار اعىنىنىڭ ارتۋىن ەسكەرە وتىرىپ، „ايەلدەر ۆاگونىن“ ىسكە قوسۋ تۋرالى شەشىم قابىلداندى. بۇل قىزمەت ىشكى تەمىرجول باعىتتارىندا دا جوعارى سۇرانىسقا يە. „ايەلدەر ۆاگونى“ قىزمەتى ىسكە قوسىلعاننان بەرى ونى 946 مىڭنان استام جولاۋشى پايدالاندى»، — دەدى «جولاۋشىلار تاسىمالى» اق باسقارما ءتوراعاسى ءانۋار احمەتجانوۆ.
ءقازىر پويىز كۇن سايىن جۇرەدى: الماتى ستانسياسىنان جونەلتىلۋى — 19:05؛ تاشكەنت ستانسياسىنا كەلۋى — 12:53 (تاشكەنت ۋاقىتى)؛ تاشكەنت ستانسياسىنان جونەلتىلۋى — 14:41 (تاشكەنت ۋاقىتى)؛ الماتى ستانسياسىنا كەلۋى — 08:51.
جاڭا ۆاگوننىڭ ىسكە قوسىلۋىمەن «ايەلدەر ۆاگونى» قىزمەتى قولجەتىمدى باعىتتار سانى 14-كە دەيىن ارتادى: №77/78 «الماتى — ماڭعىستاۋ»؛ №351/352 «الماتى — ماڭعىستاۋ»؛ №45/46 «پاۆلودار — تۇركىستان»؛ №37/38 «ماڭعىستاۋ — سەمەي»؛ №47/48 «اتىراۋ — استانا»؛ №33/34 «اقتوبە — الماتى»؛ №3/4 «استانا — الماتى»؛ №71/72 «استانا — شىمكەنت»؛ №353/354 «استانا — سەمەي»؛ №23/24 «اقتوبە — الماتى»؛ №25/26 «الماتى — شىمكەنت»؛ №613/614 «ورال — ماڭعىستاۋ»؛ №81/82 «نۇرلى جول — ورال»؛ №1/2 «الماتى-2 — تاشكەنت».
ايەلدەر ۆاگونىندا 7 جاسقا دەيىنگى ۇل بالالاردىڭ ەرەسەكتەرمەن بىرگە جۇرۋىنە رۇقسات ەتىلەدى. مۇنداي ۆاگوندارعا بيلەتتەر تەك ايەلدەرگە ساتىلادى، ال ولارعا تەك ايەل وتكىزگىشتەر قىزمەت كورسەتەدى.