وسكەمەندە گيدروەلەكتروستانسيا اۋدانىندا ايۋدىڭ پايدا بولعانى تىركەلدى. جىرتقىش بەينەباقىلاۋ كامەرالارىنىڭ وبەكتيۆىنە ءتۇسىپ، ودان كەيىن الەۋمەتتىك جەلىلەردە ءتيىستى ۆيدەو پايدا بولدى. ماماندار ايۋدى تۇرعىن ءۇي اۋداندارىنان قۋىپ جىبەرۋ ءۇشىن ونى ىزدەۋگە كىرىستى، دەپ حابارلايدى infohub.kz سايتى.
Instagram-داعى ablaketka_novosti اككاۋنتىندا دابىلدى ەسكەرتۋ پايدا بولدى: «اباي بولىڭىزدار: سەس ماڭىنداعى ايلاق اۋدانىندا بەينەباقىلاۋ كامەرالارىنا ايۋ ءتۇسىپ قالدى. مۇمكىندىگىنشە جاقىن ارادا سول جاققا سەرۋەندەۋگە بارماڭىزدار، اسىرەسە كەشكى ۋاقىتتا».
بەلگىلى بولعانداي، ورمان جانە اڭشىلىق شارۋاشىلىعى جەدەل وتريادىنىڭ قىزمەتكەرلەرى ىزدەۋگە شىعىپ كەتكەن. جەدەل وترياد باستىعىنىڭ ورىنباسارى سەرگەي كارماننيكوۆ: «ءبىزدىڭ ينسپەكتورلار ءقازىر ابلاكەتكاداعى باقشالار اۋدانىندا، ولار درونداردى قولدانىپ، جاعدايدى اۋەدەن باقىلايدى. ايۋ ءبىر جەردە وتىرمايتىنى تۇسىنىكتى، ءبىر جەردە پايدا بولىپ، كەتىپ، جاتىپ الىپ، تۇندە قايتا پايدا بولۋى مۇمكىن، سوندىقتان ءبىزدىڭ ينسپەكتورلار سول اۋداندا كەزەكشىلىكتى جالعاستىرادى جانە اڭدى انىقتاعان كەزدە ونى قۋىپ جىبەرەدى»، — دەدى.
كارماننيكوۆتىڭ ايتۋىنشا، بيىل دا، وتكەن جىلى دا شىعىس قازاقستان وبلىسىنىڭ قالالارى مەن اۋىلدارىنان ەلدى مەكەندەرگە كىرەتىن ايۋلار تۋرالى كوپتەگەن وتىنىشتەر تۇسۋدە. قازىرگى ۋاقىتتا ينسپەكتورلار ۇلكەن نارىم، سەرەبريانسك، ريددەر جانە اسۋبۇلاق تۇرعىندارىنىڭ وتىنىشتەرىن وڭدەپ جاتىر.
جىرتقىشتاردىڭ مۇنداي مىنەز-قۇلقىنىڭ سەبەبى بۇرىنعىداي — ازىق قورىنىڭ تاپشىلىعى. ورماندا جيدەك، ساڭىراۋقۇلاق جانە جاڭعاق جوقتىڭ قاسى. بيولوگيا عىلىمدارىنىڭ كانديداتى كونستانتين پروكوپوۆ: «شىعىس قازاقستاندا قوڭىر ايۋلاردىڭ سانى ءوستى، بۇل جىرتقىشتاردى ازىق ىزدەپ ەلدى مەكەندەرگە كىرۋگە ءماجبۇر ەتەدى»، — دەپ قوستى.