بىرىككەن اراب امىرلىكتەرىندە قازا تاپقان ەكى قازاقستان ازاماتشاسىنىڭ دەنەسى وتانىنا جەتكىزىلدى، دەپ حابارلايدى infohub.kz.
قازاقستان رەسپۋبليكاسى سىرتقى ىستەر مينيسترلىگىنىڭ رەسمي وكىلى جانبولات ۋسەنوۆتىڭ ايتۋىنشا، 28 تامىزدا قازاقستاننىڭ دۋبايداعى باس كونسۋلدىعى اقجان بوقانوۆا مەن جۇلدىز بوقانوۆانىڭ دەنەلەرىن وتانىنا جەتكىزۋدى ۇيىمداستىردى.
ءسىم وكىلىنىڭ مالىمەتىنشە، قازا بولۋ جاعدايلارىن تەرگەۋدى ءباا قۇقىق قورعاۋ ورگاندارى جالعاستىرۋدا. قازاقستاندىق ديپلوماتتار ەميرات تاراپىنىڭ پروكۋراتۋراسىمەن جانە باسقا دا قۇزىرەتتى ورگاندارىمەن بايلانىستا بولىپ، قايتىس بولعانداردىڭ وتباسىنا قاجەتتى كومەك كورسەتۋدى جالعاستىرادى.
«ق ر سىرتقى ىستەر مينيسترلىگى قايتىس بولعانداردىڭ تۋعان-تۋىستارى مەن جاقىندارىنا تاعى دا شىن جۇرەكتەن كوڭىل ايتادى»، — دەپ اتاپ ءوتتى جانبولات ۋسەنوۆ.
ەسكە سالايىق، بىرنەشە كۇن بۇرىن ءسىم ءباسپاسوز قىزمەتى شاردجا قالاسىندا ەكى قازاقستاندىق ايەلدىڭ قازا تاپقانىن حابارلاعان بولاتىن. كەيىن 20 جانە 22 جاستاعى اپالى-سىڭلىلەردىڭ جالاقى تابۋ ءۇشىن كەتىپ، سۇلۋلىق سالونىندا جۇمىس ىستەگەنى بەلگىلى بولدى. ولار جالدامالى پاتەردەن ءولى كۇيىندە تابىلدى. بولعان وقيعانىڭ سەبەپتەرى مەن زورلىق-زومبىلىق بەلگىلەرىنىڭ بار-جوعى ازىرگە انىقتالماعان.